काठमाडौँ । हेटौँडा उपमहानगरको तीन वटा वडामा नेपाली कांग्रेसका दुई–दुई जनाले अध्यक्ष पदको टिकट पाएका छन् । हेटौँडाको २, १० र १९ नम्बर वडामा कांग्रेसका दुई–दुई जनाले टिकट पाएका हुन् ।

२ मा विष्णुगोपाल महर्जन र रविन्द्र घिमिरे १० मा रमेशध्वज कार्की र युवराज लामा तथा १९ मा रामकुमार थापा र शालिकराम अधिकारीले कांग्रेसको तर्फबाट वडा अध्यक्षको टिकट पाएका हुन् ।

सबै टिकटमा नेपाली कांग्रेसका बागमती प्रदेश महामन्त्री कञ्चनचन्द्र वादेको हस्ताक्षर रहेको छ । २ नम्बर वडाका महर्जनले कांग्रेसको तर्फबाट मनोनयन दर्ता गराइसकेकोले घिमिरेले भने स्वतन्त्रबाट उम्मेदवारी दिएका थिए । यस्तै, १० नम्बर वडामा कार्कीले मनोनयन दर्ता गराइसकेकोले लामाले उम्मेदवारी दर्ता नगराई हिँडेका थिए ।

१९ नम्बर वडामा रामकुमार थापाले मनोनयन दर्ता गराएको थाहा पाएपश्चात अर्का दाबेदार शालिकराम अधिकारी उम्मेदवारी नै नदिएर फर्केका थिए । एउटै वडामा एउटै पार्टीबाट दुई जनालाई टिकट दिएको भन्दै कांग्रेसका नेताहरू जिल्ला नेतृत्वसँग असन्तुष्ट बनेका छन् ।

जिल्ला समितिले मन लाग्दी गरेको भन्दै उनीहरूले विरोधसमेत जनाएका छन् ।