काठमाडौँ । स्थानीय तह निर्वाचनको १२ पालिकामा अन्तिम मत परिणाम आउन बाँकी छ । निर्वाचन आयोगका अनुसार हालसम्म ४६० गाउँपालिकाका र २७९ नगरपालिकाको अन्तिम नतिजा सार्वजनिक भइसकेको छ ।

देशभर भएका ६ मध्ये ३ महानगरको मत गणना भइसकेको छ । विराटनगर, भरतपुर र वीरगञ्ज महानगरको मत परिणाम सार्वजनिक भइसकेको छ । विराटनगरमा नागेश कोइराला, भरतपुरमा रेनु दाहाल र वीरगञ्ज महानगरमा राजेशमान सिंह विजयी भएका छन् ।

काठमाडौँ, पोखरा र ललितपुर महानगर, तुलसीपुर उपमहानगर, उदयपुरको कटारी र त्रियुगा नगरपालिका, रौतहटको गढीमाई, गरुडा र फतुवा विजयपुर नगरपालिका, रुपन्देहीको तिलोत्तमा नगरपालिका, कपिलवस्तुको महाराजगञ्ज नगरपालिका, बाजुराको बूढीगंगा गाउँपालिकालगायत केही पालिकामा मत गणना जारी रहेको आयोगले जनाएको छ ।

काठमाडौँमा स्वतन्त्र उम्मेदवार बालेन साह, ललितपुरमा कांग्रेसका चिरिबाबु महर्जन, पोखरामा नेकपा एकीकृत समाजवादीका धनराज आचार्य र तुलसीपुर उपमहानगरमा नेकपा एमालेका टिकाराम खड्का अगाडि रहेका छन् ।

नतिजा सार्वजनिक भएकामध्ये ३२२ पालिकाको प्रमुखमा कांग्रेस विजयी भएको छ । एमालेले १२३ गाउँपालिका अध्यक्ष र ७९ नगरप्रमुख गरी २०२ पालिका प्रमुख जितेको छ ।

यसैगरी नेकपा माओवादी केन्द्र २५ नगरप्रमुख र ९६ गाउँपालिका अध्यक्षसहित १२१ पालिकामा विजयी भएको छ । एकीकृत समाजवादीले ११ र अन्य दल तथा स्वतन्त्र उम्मेदवार ३० नगरमा विजयी भएको आयोगले जनाएको छ । जनता समाजवादी पार्टीले २१ नगरप्रमुख तथा साना दल र स्वन्तन्त्र उम्मेदवारले ३२ गाउँपालिका अध्यक्ष जितेका छन् ।

कांग्रेसले १०६ उपप्रमुख र १९० उपाध्यक्ष, एमालेले १०६ उपप्रमुख र १२६ उपाध्यक्ष, माओवादीले ३३ उपप्रमुख र ९५ उपाध्यक्ष, जसपाले उपप्रमुख ११ र १९ उपाध्यक्ष तथा अन्य दलले २३ उपप्रमुख र ३० उपाध्यक्ष जितेका छन् ।