बैतडी । बैतडीको सिगासमा ढुंगा लागेर एक महिलाको मृत्यु भएको छ । जिल्लाको सिगास गाउँपालिका १ सिराड बस्ने मैना धामीको बाटोमा हिँडिरहेको अवस्थामा माथिबाट खसेको ढुंगाले लागेर मृत्यु भएको हो ।

जिल्ला प्रहरी कार्यालय बैतडीका प्रवक्ता प्रहरी निरीक्षक लोकराज जोशीले शुक्रबार साँझ वडा नम्बर १ को घरबाट वडा नम्बर ३ को घरमा धान ल्याउनका लागि गइरहेका बेला बाटोमा माथिबाट खसेको ढुंगा लागेर उनको घटनास्थलमै ज्यान गएको हो ।

साँझको समयमा हावाहुरी र पानी परेका बेला माथिबाट खसेको ढुंगाले मैनाको टाउकोमा लागेको र घटनास्थलमै मृत्यु भएको जोशीले बताए । ती महिलाको शव पोष्टमार्टमका लागि पाटन प्राथमिक स्वास्थ्य केन्द्रमा ल्याइएको प्रहरीले जनाएको छ ।