काठमाडौँ । प्रहरी महानिरीक्षक (आईजीपी) नियुक्ति र एआईजी बढुवाबारे परेको रिटको सुनुवाई आगामी जेठ ३० गते हुने भएको छ । आज सुनुवाइ हुने भनिए पनि विपक्षीका नाममा म्याद तामेल हुन नसक्दा रोकिएको हो ।

नियमित पेसीअन्तर्गत आज न्यायाधीशद्वय विश्वम्भरप्रसाद श्रेष्ठ र डा. कुमार चुडालको संयुक्त इजलासमा उक्त रिट निवेदनमा पुनः ७ दिन समय दिएर म्याद तामेल गर्ने आदेश दिइएको छ ।

यसअघिको आदेशअनुसार हाल आईजीपी रहेका धिरजप्रताप सिंह, वसन्तकुमार पन्त र रविन्द्र बहादुर धानुकको नाममा म्याद तामेल हुन नसकेको हो ।

सर्वोच्चले आदेश भएको मितिले ७ दिनभित्र प्रत्यक्ष भेटेर वा विभिन्न माध्यमबाट म्याद तामेल गर्दै त्यसको तीन दिनभित्र लिखित जवाफ पेश गर्न आदेश दिएको छ । सबै प्रक्रिया पूरा भएपछि जेठ ३० गतेका लागि सुनुवाइ मिति तोकिएको छ ।

डीआईजीहरु घनश्याम अर्याल र प्रकाशजंग कार्कीले एआइजी बढुवाविरुद्धमा गत चैत १७ गते सर्वोच्चमा रिट दायर गरेका थिए । त्यसैगरी एआईजी विश्वराज पोखरेलले आफू वरिष्ठ एआईजी हुँदाहुँदै धिरजप्रताप सिंहलाई आईजीपीमा नियुक्ति गरेको भन्दै रिट दायर गरेका थिए ।