काठमाडौं । तत्काल सरकारको मन्त्रीमा थमौतीमा परे पनि आफ्नै पार्टी नेकपा एकीकृत समाजवादीका अध्यक्ष माधव नेपालले मन्त्री फेर्ने कुरा निरन्तर दोहोर्याइरहेका छन् ।

अध्यक्ष नेपालको कुरासँगै एकीकृत समाजवादीका मन्त्रीहरूको दौडधुप रोकिएको छैन । एकीकृत समाजवादीका मन्त्रीहरूले आज पनि माओवादी केन्द्रका अध्यक्ष पुष्पकमल दाहाल ‘प्रचण्ड’लाई सामूहिक रुपमा भेट गरेका छन् ।

यसअघि जेठ २२ गते एकीकृत समाजवादीले आफ्ना मन्त्री फेर्ने निर्णय गर्दै प्रधानमन्त्री शेरबहादुर देउवालाई नयाँ बन्ने मन्त्रीहरूको नाम लिष्ट बुझाएको थियो । तर, पार्टीको उक्त निर्णय असान्र्दभिक समयमा आएको भन्दै अहिले मन्त्री फेर्न नहुने लविङमा समाजवादीका मन्त्रीहरू लगेका थिए ।

समाजवादीले पर्यटनमा प्रेम आले, सहरी विकासमा रामकुमारी झाँक्री, श्रममा किसन श्रेष्ठ र स्वास्थ्यमा विरोध खतिवडालाई मन्त्री बनाएको थियो । उनीहरूलाई झिकेर नयाँ सेट एकीकृत समाजवादीले पठाउन चाहेको थियो । तर, एकीकृृत समाजवादीकै मन्त्रीहरू पार्टी निर्णयअनुसार फिर्ता हुनेभन्दा पद थमौतीमा लागेपछि निर्णय गर्न माधव नेपाल अप्ठ्यारोमा परेका थिए ।
गत २२ गते पार्टीले निर्णय गरेकै दिन उनीहरूले सत्ता गठबनधन दलका एक प्रमुख घटक माओवादी केन्द्रका अध्यक्ष प्रचण्ड निवास पुगेर थमौतीका लागि लविङ गरेका थिए ।

भोलिपल्ट एकीकृत समाजवादीका मन्त्रीहरूले बिहानै प्रधानमन्त्री निवास बालुवाटार पुगेर प्रधानमन्त्री शेरबहादुर देउवालाई भेटेका थिए । यस क्रममा अहिले सरकार हेरफेर गर्दा बजेट पारित गराउन समस्या आउने र त्यसले सरकारको भविष्यसमेत खतरामा पर्ने बताएपछि देउवा मन्त्री फेर्ने माधव नेपालको प्रस्तावबाट पछि हटेका थिए ।

त्यसपछि गठबन्धन बैठकमा बजेटपछि अलिक छलफल गरेर निर्णयमा पुगिने भनेर माधव नेपालको मन्त्री फेर्ने प्रस्ताव यतास्थितिमा राखिएको थियो । तर, अध्यक्ष नेपालले निरन्तर पार्टीका मन्त्रीलाई धन्यवाद दिँदै नयाँ सेट नै जाने बताएपछि उनीहरू सामूहिक रुपमा गठबन्धन दलका नेताहरूसँगको भेटघाटमा लागेका हुन् ।

उनीहरू दोहोर्याएर प्रचण्डसँग भेट गरेका हुन् । प्रचण्डलाई भेट्न पर्यटन मन्त्री आले, श्रम मन्त्री श्रेष्ठ, सहरी विकास मन्त्री झाँकी र स्वास्थ्य मन्त्री खतिवडा दिउँसो खुमलटार पुगेका थिए । प्रचण्डसँग एकीकृत समाजवादीका मन्त्रीहरूले झण्डै एक घण्टा छलफल गरेका थिए । छलफलका विषयमा दुवै पक्षले केही खुलाएका छैनन् ।

तर, आजै एकीकृत समाजवादीका अध्यक्ष नेपालले आफ्नो पार्टीले निर्णय लिँदा गठबन्धनकै अन्य दलमा भूकम्प गएको बताएका थिए । एकीकृत समाजवादीका विद्यार्थी संगठनका अध्यक्षले भने मन्त्रीहरू प्रचण्ड र देउवाकहाँ पुगेर मन्त्री जोगाइदिन लविङ गरिरहेको बताएका थिए ।