काठमाडौँ । भारतीय अभिनेता सलमान खानलाई मार्ने धम्कीपूर्ण पत्र पठाइएको छ । भारतकै गायक, गीतकार तथा अभिनेता सिद्धु मुसेवालाको गोली हानी हत्या गरेको केही हप्तापछि सलमान खानलाई यस्तो धम्की आएको हो ।

सलमानलाई मार्ने धम्कीपूर्ण पत्र प्राप्त भएपछि मुम्बई क्राइम ब्राञ्चले ठूलो खुलासा गरेको छ । ब्राञ्चका कर्मचारी लरेन्सका नजिकको सहयोगी सौरभ महाकालसँग सोधपुछ गर्न पुणे पुगेको थियो ।

सोधपुछका क्रममा उनले सलमान खानलाई यो पत्र ग्याङ्स्टर लरेन्स बिश्नोईको तर्फबाट पठाइएको बताए । घटनाको खुलासा भएपछि प्रहरीको ६ टोली देशका विभिन्न भागमा गएको छ ।

भारतीय समाचार एजेन्सी एएनआईको रिपोर्टका अनुसार मुम्बई प्रहरीले सलमान खान र उनका बुबा सलिम खानलाई धम्कीपूर्ण पत्र लेखेको जेलमा रहेका ग्याङ्स्टर लरेन्स नै भएको बताएको छ । लरेन्सको गिरोहका तीन जना राजस्थानको जालोरबाट मुम्बईमा चिठी छोड्न आएका थिए । पत्र छोडेपछि तीनै जनाले अभियुक्त सौरभ महाकाललाई पनि भेटेका थिए ।

प्रहरीका अनुसार सौरभले यो चिठी गोल्डी ब्रारमार्फत सलिम खानलाई पुर्याएको बताएका थिए । मुम्बई प्रहरीले थप भनेको छ कि अपराध शाखाले पत्र पठाउने व्यक्तिको पहिचान गरेको छ । उनीसँग सम्बन्धित केही सुराक फेला परेका छन् । छिट्टै उनीहरू पक्राउ पर्ने छन् ।

कालो हरिण र सलमान

कालो हरिण शिकार प्रकरणमा लरेन्स बिश्नोईले सलमान खानलाई मार्ने षड्यन्त्र रचेको आरोप लागेको थियो । बिश्नोई समुदायले कालो हरिणलाई पवित्र मान्ने भएकाले त्यसको शिकार गरेको आरोपमा लरेन्सले सलमान खानलाई मार्ने धम्की दिएको समाचार जनाइएको छ ।

जोधपुरमा मार्ने योजना

सन् २०१८ मा लरेन्स बिश्नोईले अदालत बाहिर जोधपुरमा सलमान खानलाई मार्ने बताएका थिए । त्यसबेला उनले भनेका थिए, ‘मैले अहिलेसम्म केही गरेको छैन, तर जब मैले सलमान खानलाई मार्ने छु, तब थाहा पाउने छु, अहिले म अनावश्यक कुरामा तानिएको छु ।’