खोटाङ । भारी वर्षापछि गएको पहिरोले खोटाङमा एक घर बगाएको छ । यस्तै, पशु चौपाय पुरेको छ ।

शुक्रबार रातिको भारी वर्षासँगै माथिबाट खसेको पहिरोले रावाबेँसी गाउँपालिका ६ हौंचुरका बलराम खत्रीको घर बगाएको हो । खत्री परिवार इटहरीमा सरिसकेकाले मानयीय क्षति नभएको वडाध्यक्ष चिरञ्जिवी कार्कीले बताए ।

पहिरोले भैरबहादुर राईको गोठ बगाउँदा एउटा भैंसी, एउटा पाडो र एउटा गोरु पुरिएको छ । भैंसीलाई पहिरोबाट उद्धार गरेर निकालिएको छ । गोरु हालसम्म फेला नपरेको वडाध्यक्ष कार्कीले बताए ।

सडकबाट खसेको पहिरोले भैरबहादुर राई, उद्योगबहादुर भुजेल, कृष्णबहादुर राई, पत्थरबहादुर राई, धनकुमार राई, बर्णबहादुर राई, हरि राई, पर्शुराम राई र प्रदिप राईको घर जोखिममा परेको छ । चित्रबहादुर कार्की र शुक्रराज राईको घर जोखिममा परेको कार्कीले बताए ।