काठमाडौँ । एनएमबि बैंकले विदेशमा अध्ययनरत तथा विदेशमा अध्ययन गर्न जाने विद्यार्थीलाई लक्षित गरी डिजिटल भुक्तानीका लागि फ्लाइवायर कर्पोरेशनसँग द्विपक्षीय समझदारी गरेको छ ।

यो समझदारीसँगै एनएमबि बैंक फ्लाईवायरको तर्फबाट विश्व भरका एक हजार ७०० भन्दा बढी शैक्षिक संस्थामा भुक्तानीका लागि नेपालको एकमात्र बैंक भएको छ । नेपालबाट विदेशमा अध्ययनरत तथा विदेश अध्ययन गर्न जाने विद्यार्थीले फ्लाइवायरमार्फत अमेरिका, क्यानडा र अष्ट्रेलियामा अन्तर्राष्ट्रिय शिक्षाको भुक्तानीका लागि कुनै पनि नेपाली बैंकबाटै आफ्नो शैक्षिक खर्च तिर्न सक्ने छन् ।

अन्तर्राष्ट्रिय शैक्षिक भुक्तानी गर्न चाहने नेपाली ग्राहकले परम्परागत भुक्तानी प्रक्रिया निकै झन्झटिलो र सुरक्षा जोखिमयुक्त थियोे । त्यसै गरी रकम प्राप्त हुने संस्थामा पनि ट्युशन शुल्क सजिलै ट्रयाक गर्न र विभिन्न मुद्रामा भएको भुक्तानी स्वीकार गर्न गाह्रो हुने तथा धेरै कागजी प्रक्रिया पूरा गर्नु पर्ने बाध्यता थियो ।

‘फ्लाइवायरसँगको सहकार्यले हामी ग्राहकका लागि विभिन्न जोखिमहरु हटाई एक सुव्यवस्थित भुक्तानी प्रदान गर्ने लक्ष्य राख्द्छौँ, यसले अन्तर्राष्ट्रिय शैक्षिक भुक्तानीमा एकद्वार समाधानको श्रोतले गर्दा महत्वपूर्ण हुनेछ,’ एनएमबि बैंकका प्रमुख कार्यकारी अधिकृत सुनिल केसीले भने ।