काठमाडौँ । साताको अन्तिम कारोबार दिन नेप्से परिसूचक सामान्य अंकले वृद्धि भएको छ । बिहीबार नेप्से परिसूचक ४.१५ अंक बढेर १८७०.६३ बिन्दुमा बन्द भएको हो ।

बिहीबार कारोबारमा आएका २२२ कम्पनीको २६ लाख ९८ हजार कित्ता शेयर ८२ करोड ९६ लाख ४६ हजार रुपैयाँ बराबरको खरिद बिक्री भएको छ । बुधबारको तुलनामा बिहीबार कारोबार रकममा सामान्य सुधार भएको छ । बुधबार ६९ करोड १७ लाख ३७ हजार रुपैयाँ बराबरको खरिद बिक्री भएको थियो ।

नेप्सेका १३ उपसमूहमध्ये जलविद्युत उपसमूहको परिसूचकबाहेक अरु सबै उपसमूहको परिसूचक बढेको छ । जसमा उत्पादन तथा प्रशोधन उपसमूहको परिसूचक १.५३ प्रतिशत बढेको छ । त्यस्तै, विकास बैंक उपसमूहको परिसूचक १ प्रतिशत बढेको छ ।

बिहीबार अभियान लघुवित्त वित्तीय संस्थाको शेयर सकारात्मक सर्किट लेभलमा कारोबार भएको छ । त्यस्तै, रुरु जलविद्युत परियोजनाको शेयर मूल्य ८ प्रतिशतभन्दा बढी बढेको छ ।

यता, सिटिजन्स म्युचुअल फण्ड २ को इकाइ मूल्य ४.४५ प्रतिशत घटेको छ । आज नबिल बैंकको तीन करोड ४० लाख ३५ हजार रुपैयाँ बराबरको शेयर कारोबार भएको छ ।