काठमाडौँ । दीर्घ कालीन रोग लागेका व्यक्तिहरुको सामान्य उपचार तथा हेरचाह र निको नहुने रोग लागेका मानिसहरुको हेरचाह गर्ने संस्था हस्पिस नेपालको भवन निर्माणको धापाखेलमा शिलान्यास भएको छ ।

हस्पिस नेपाल, नेपाल सरकारमा विधिवत रुपमा दर्ता भएको गैर–नाफा मुलक, गैर–सरकारी संस्था हो । देशमा उपशामक सेवाको विकास गर्ने उद्धेश्यले २०५७ सालमा यसको स्थापना भएको थियो । यसले लगनखेलमा आठ शैय्याको एकाइमा बिरामी सेवा, काठमाडौं उपत्यकामा सामुदायिक सेवा र मकवानपुर जिल्लाको ग्रामीण भेगमा सेवा प्रदान गर्दै आएको छ ।

यी दुवै सेवाहरु निःशुल्क प्रदान गरिदैँ छन् । देशैभरि उपशामक सेवा उपलब्ध गराउन हस्पिस नेपालले तालिम प्राप्त स्वास्थ्यकर्मी सहितको सुविधायुक्त २० शैय्याको नमुना उपशामक सेवा केन्द्रको अवधारणा बनाएको छ ।

यसका लागि ललितपुरको धापाखेलमा ५ रोपनी जग्गा लिइएको छ भने राष्ट्रिय र अन्तर्राष्ट्रिय रुपमा कोष संकलन गर्ने कार्य जारी छ । उक्त जग्गाको लागि निक साइमन संस्थाका संस्थापकद्वय जिम र मेरिलिन साइमनले सहयोग रकम उपलब्ध गराएका हुन् । सो समारोहमा उनीहरूको पनि उपस्थिति रहेको थियो ।

प्रोजेक्ट हस्पिस नेपालमा संलग्न सम्पूर्ण सदस्यहरुको निरन्तरको प्रयास पश्चात ललितपुरको धापाखेलमा गत असोज २५ गते भवनको शिलान्यास गरिएको छ । सो भवन निर्माणको कुल लागत लगभग १५ करोड रहेको छ, जस मध्य विभिन्न दाताहरूबाट चार करोड रुपैयाँ सहयोग संकलन भइसकेको छ । यसको स्थापनाले मुलुकमा उपशामक सेवाले नयाँँ उचाइ प्राप्त गर्ने र एउटा उदाहरणीय सेवा केन्द्रको स्थापना हुनेछ भन्ने विश्वास सो केन्द्रका संस्थापक त्रय डा.राजेश गंगोल, डा.प्रदीप वैद्य र ओम राजभण्डारीको रहेको छ ।

सो भवनको पहिलो चरणको निर्माण कार्य २ वर्षमा सम्पन्न गर्ने र सम्पूर्ण परियोजनालाई ४ वर्षमा सम्पन्न गर्ने अठोटका साथ हस्पिस नेपालका सबै बोर्ड सञ्चालक हौसिएका छन् । साथै सबै दाता मनलाई यो अत्यावश्यक सेवा केन्द्र स्थापना गर्न आव्हान पनि गरेका छन् ।