काठमाडौँ । आइसिसी विश्वकप लिग २ अन्तर्गत नेपाल, स्कटल्याण्ड र नामिबियाबीचको त्रिकोणात्मक एक दिवसीय सिरिजको उपाधि नेपालले जितेको छ ।

त्रिवि किक्रेट मैदानमा भएको अन्तिम खेलमा नेपालका लागि कप्तान रोहितकुमार पौडेलले शानदार प्रदर्शन गर्दा नेपाल विजयी भएको हो । हार नजिक पुगेको नेपालका लागि कप्तान पौडेलले अविजित ९५ रन बनाए । उनले ७ चौका र ४ छक्का प्रहार गरे ।

यस्तै, आठौँ ओभरमा गएका करण केसीले अविजित ३१ रन बनाए । उनले ३७ बल खेल्दै उक्त रन बनाएका हुन् । नेपालको जितमा पौडेल र केसीले नवौं विकेटका लागि अविजित रुपमा ७५ रनको साझेदारी गरे । यो नेपालका लागि नवौं विकेटका लागि भएको कीर्तिमानी साझेदारी हो ।

स्कटल्याण्डले दिएको २१३ रनको लक्ष्य पछ्याएको नेपालले ८ विकेट गुमाएर ४३ ओभर खेल्दै उपाधि रक्षा गरेको हो ।

खेलमा सन्दीप लामिछानेले उत्कृष्ट बलिङ गर्दै चार विकेट लिएपछि स्कटल्याण्ड २१२ रनमा समेटिएको थियो । तर, नेपाली ब्याट्सम्यानहरूूले रनका लागि धेरै संघर्ष गरेका थिए ।

कुनै पनि ब्याट्सम्यानले सेटल भएर खेल्न नसक्दा नेपालले १३८ रनमै आठ विकेट गुमाएको थियो । हार निश्चित भएको अवस्थामा रोहितले नेपाललाई जित उन्मुख बनाएका थिए ।