काठमाडौँ । नेकपा एमालेका उपाध्यक्ष विष्णु पौडेलले आर्थिक वर्ष २०८०/८१ को बजेट कार्यान्वयन हुन नसक्ने दाबी गरेका छन् ।

सोमबार संघीय संसद भवन नयाँ बानेश्वरमा सञ्चारकर्मीसँग कुराकानी गर्दै उपाध्यक्ष पौडेलले सरकारले ल्याएको आगामी आर्थिक वर्षको बजेट कार्यान्वयन हुन नसक्ने बताएका हुन् । उनले बजेटले अर्थतन्त्रको समस्या नचिनेको टिप्पणी गरे ।

‘यसले अर्थतन्त्रका समस्या चिनेको छैन, समस्या समाधानका विकल्पहरू, दृष्टिकोण दिन सकेको छैन, स्रोतको प्रस्ताव, अनुमान र खर्चको अनुमान यथार्थपरक छैन,’ उनले भने, ‘त्यस कारणले यो बजेट कार्यान्वयन हुन्छ कि हुन्न भन्ने कुरामा स्वयं अर्थमन्त्री जीलाई चिन्ता छैन, सरकारलाई चिन्ता छैन, हामी सबै स्पष्ट छौँ, यो कार्यान्वयन हुने बजेट होइन ।’

त्यस्तै, देशमा विद्यमान समस्या समाधानका विकल्प र दृष्टिकोण पनि बजेटमा नभएको उनको भनाइ थियो । उनले बजेट हावादारी भएको टिप्पणी गरे । ‘चुनौतीको प्रश्न नै भएन नि जुन बजेट कार्यान्वयन हुँदैन यो त स्वयं हावादारी बजेट छ,’ उनले थपे ।