काठमाडौं । अभिनेत्री पूजा शर्मा पहिलो पटक एक्सन भूमिकामा काम गर्ने तयारीमा छिन् । फिल्म ‘दान्भी’मा उनी एक्सन लेडीका रुपमा देखिन लागकी हुन् ।

यसै शुक्रबार उनलाई एक्सन अवतारमा प्रस्तुत गर्दै फिल्मको पोस्टर सार्वजनिक गरिएको थियो । सार्वजनिक पोस्टरमा देखिएको दुई हातमा पेस्तोलसहित प्रस्तुत उनको एक्सन लुक्सले दर्शकमा कौतुहलता जगाएको छ ।

फिल्मका लागि पूजा यतिबेला कसरतमा लागेकी छन् । शरीर कसिलो बनाउन लामो समयदेखि जिममा मिहिनेत गरिरहेकी उनले दुई हप्तादेखि एक्सनको तालिम पनि लिइरहेकी छन् । उनले सामाजिक सञ्जालमा एक्सन सिकिरहेका भिडियो पनि पोष्ट गरिरहेकी छिन्।

रुपेश तामाङको निर्देशन रहने यो फिल्म नेपाल र सिक्किममा छायांकन गरिने बताइएको छ । फिल्ममा पूजासँगै कुन्साङ बोमजमको मुख्य भूमिका रहनेछ ।