काठमाडौँ । नेपाल राष्ट्र बैंकका गभर्नर महाप्रसाद अधिकारीले अन्तर्राष्ट्रिय स्तरमा ठूलो सम्भावना भएको चार्टर्ड एकाउण्टेन (सीए) पेशा रहेको बताएका छन् । बिहीबार काठमाडौँमा नेपाल चार्टर्ड एकाउण्टेन्ट्स संस्थाले आयोजना गरेको कार्यक्रममा बोल्दै उनले यस्तो बताएका हुन् ।

गभर्नर अधिकारीले सीएको अध्ययनले विभिन्न संस्कृति र व्यवसायिक अभ्यासहरू बुझ्ने र विश्वव्यापी मानसिकताको विकास गर्ने ज्ञानलाई फराकिलो बनाउन मद्दत गर्ने बताए ।

‘व्यवसायको विश्वव्यापी प्रकृतिको अर्थ भनेको चार्टर्ड एकाउण्टेन्सी अन्तर्राष्ट्रिय सन्दर्भमा बढ्दो रूपमा अपग्रेड हुँदै गइरहेको छ, विभिन्न संस्कृति र व्यवसायिक अभ्यासहरू बुझ्ने र विश्वव्यापी मानसिकताको विकास गर्ने आफ्नो क्षितिज फराकिलो बनाउन यो अवसर हेर्नु पनि उत्तिकै महत्वपूर्ण छ,’ उनले भने, ‘नेपाल र विदेशका सबै सहभागी प्यानल र पेपर प्रस्तुतकर्तालाई म सन्देश दिन चाहन्छु कि भविष्यमा हाम्रो पेशाको लागि राम्रो र सम्भावना छ ।’

उनले पछिल्लो समय प्रविधिको विकाससँगै सीएको काम महत्वपूर्ण हुँदै गएको बताएका थिए । उनले सीए पेशालाई रणनीतिक र विश्वसनीय व्यापार साझेदारको रूपमा परिभाषित गर्न आवश्यक रहेको बताए ।

‘प्रविधिको विकाससँगै कार्यालयमा चार्टर्ड एकाउण्टेनको काम महत्वपूर्ण हुँदै गइरहेको छ, विश्वव्यापीकरण परिवर्तनहरू चलिरहेको छ, हामीलाई आज थाहा भएको कुराले भोलि काम नगर्न सक्छ,’ गभर्नर अधिकारीले भने, ‘त्यसैले हामीले आफ्नो पेशालाई रणनीतिक र विश्वसनीय व्यापार साझेदारको रूपमा पुनः परिभाषित गर्ने अवसरको रूपमा परिवर्तन गर्दै लैजानु पर्छ ।’

उनले विश्वमा पछिल्लो समय अन्तर्राष्ट्रिय रुपमा नै सीएको विकास र विस्तार हुँदै गएको भन्दै भविष्यमा राम्रो सम्भावना रहेको बताए ।