काठमाडौं । नेपाल नागरिक उड्डयन प्राधिकरणले सिम्रिक एयरको उडानमा रोक लगाएको छ । प्राधिकरणको टोलीले गरेको वित्तीय अडिटमा कमजोर वित्तीय अवस्था देखिएकाले रोक लगाइएको हो । साथै प्राधिकरणलाई तिर्नुपर्ने ४६ लाख रुपैयाँ पटक–पटक ताकेता गर्दा पनि नतिरेपछि सेवामा रोक लगाइएको प्राधिकरणका सूचना अधिकारी ज्ञानेन्द्र भुलले बताए ।

कमजोर वित्तीय अवस्थाका कारण कर्मचारीले पारिश्रमिक नै नपाउने अवस्था देखिएको प्राधीकरणले जनाएको छ । भुलले प्राधिकरणले सिम्रिकका चार वटै हेलिकप्टर उडानमा रोक लगाएको जानकारी दिए ।

सिम्रिकसँग अहिले २ वटा बेल र २ वटा एएस ३५० हेलिकप्टर छन् । अब कम्पनीले प्राधिकरणलाई तिर्न बाँकी ४६ लाख रुपैयाँ बक्यौता चुक्ता गरी आफ्नो वित्तीय अवस्थाबारे आस्वस्त पार्न सके मात्र उडानबारे पुनःर्विचार हुन सक्ने भुलले बताए ।

एयरले तिर्नुपर्ने त्रिभुवन अन्तर्राष्ट्रिय विमानस्थलमा मात्र २७ लाख ९३ हजार रुपैयाँ वक्यौता रहेको प्राधीकरणले जनाएको छ । लुक्लामा १५ लाख ७२ हजार ९६५ रुपैयाँ तथा ताप्लेजुङ विमानस्थलमा ४ लाख ३७ हजार र सिमिकोट विमानस्थलमा १ लाख ५८ हजार वक्यौता पनि स्रोतले बतायो ।