काठमाडौं । राष्ट्रिय स्वतन्त्र पार्टीले पार्टी केन्द्रीय सदस्य मोहनजंग थापामाथी छानबिन थालेको छ । मेडिकल व्यवसायी दुर्गा प्रसाईंसँग दुई करोड रुपैयाँ मागेको अडियो सार्वजनिक भएपछि सांसद पदबाट हटाएका ढाकाकुमार श्रेष्ठले एक टेलिभिजनमा दिएको अन्तवार्तालाई आधार बनाएर रास्वपाले केन्द्रीय सदस्य थापामाथी अनुसन्धान छानबिन थालेको हो ।

केही दिनअघि एक टेलिभिजन अन्तर्वार्तामा ढाकाले सभापति रवि लामिछानेको कोर टिमको सदस्य मोहनजंगले आफुलाई मन्त्री बनाइदिने भन्दै तीन करोड रकम माग गरेको बताएका थिए ।

ढाकाको अडिओ सार्वजनिक भएपछि उनलाई त्यसैबेला रास्वपाले कारवाही गरी सांसदबाट हटाएको थियो । अहिले ढाकाले दिएको अन्तवार्तालाई आधार बनाएर केन्द्रीय सदस्य थापामाथी रास्वपाले छानबिन थालेको हो ।

‘केन्द्रीय अनुशासन आयोगका प्रमुखसमेतको उपस्थितिमा हिजो बसेका पार्टीको केन्द्रीय कार्यसम्पादन समितिको बैठकमा यस विषयमा छलफल भएको थियो,’ रास्वपा महामन्त्री मुकुल ढकालले बुधबार विज्ञप्ति जारी गदै भनेका छन्,–‘ यस सम्बन्धमा केन्द्रीय अनुशासन आयोगबाट केन्द्रीय सदस्य मोहनजंग थापालाई सोधपुछ तथा अनुसन्धानको प्रक्रिया अगाडि बढाइएको छ।’

बिनाआधार, बिनाप्रमाण पार्टीको छविमा आँच पुर्‍याउने कलुषित मनसायले आम जनसमुदायमाझ पार्टीका सम्बन्धमा फैलाइएका सूचनाबाट भ्रममा नपर्न रास्वपाले आग्रह पनि गरेको छ।

‘तथापि राष्ट्रिय स्वतन्त्र पार्टी पारदर्शिता, जवाफदेहिता र भ्रष्ट्राचारप्रति शून्य सहनशीलताको नीति अनुसरण गर्ने पार्टी भएकाले यस प्रकरणमा अझै पनि पार्टीका कुनै पनि तहको पदाधिकारी वा केन्द्रीय सदस्यले पार्टीको नाम प्रयोग गरी कसैसँग पैसा मागेको ठोस प्रमाण लिएर डा. श्रेष्ठ वा जोकोही आउनुभएको अवस्थामा पार्टीले त्यस्ता सदस्य जोकोही भए पनि प्रमाण पेश भएको ७२ घन्टाभित्र कारवाही गरिने व्यहोरा सम्बन्धित सबैमा जानकारी गराउँदछौं,’ रास्वपाको विज्ञप्तिमा भनिएको छ।