मकवानपुर । नेपाल चिकित्सक संघले हेटौँडाको सञ्चो अस्पतालमा चिकित्सकमाथि भएको हातपातको विषयमा प्रहरीसमक्ष उजुरी दिएको छ । घटनामा संलग्न व्यक्तिहरूलाई पक्राउ गरी कारबाहीको माग गर्दै संघले जिल्ला प्रहरी कार्यालय मकवानपुरमा उजुरी दिएको हो ।

संघले पठाएको उजुरी जिल्ला प्रहरी कार्यालय मकवानपुरका प्रमुख प्रहरी उपरीक्षक सीताराम रिजाल समक्ष पेस भएको र औपचारिक रूपमा शुक्रबार मात्र उजुरी दर्ता हुने भएको छ । सार्वजनिक बिदा र साँझ अबेर गरी संघको उजुरी प्राप्त भएकाले शुक्रबार मात्र उजुरी दर्ता हुने प्रहरी उपरीक्षक रिजालले जानकारी दिए ।

बुधबार सञ्चो अस्पतालमा चिकित्सकद्वय डा. विकास थापा र प्रशान्त बिडारीमाथि कुटपिट भएको थियो । गत साउन २५ गते अस्पतालमा उपचारका लागि आएका ४१ वर्षीय राजेश प्रधानको मृत्युको विषयलाई लिएर चिकित्सकद्वय थापा र बिडारी माथि हातपात भएको थियो ।

घटनाका विषयलाई लिएर कुटपिट भएका चिकित्सकहरूलाई उजुरी दर्तामा सुरक्षा थ्रेट आएपछि संघले संस्थागत रूपमा उजुरी दर्ता गराएको हो । जिल्लामा कार्यरत स्वाथ्यकर्मीहरुको सुरक्षा चुनौतीको विषयलाई मध्यनजर गर्दै घटनाबारे अनुसन्धान गर्न र संलग्नहरूलाई कारबाही गरी माग गर्दै संघले नेतृत्व लिएर काठमाडौँबाट प्रहरी समक्ष उजुरी दर्ताको लागि पठाएको हेटौँडा अस्पतालका मेडिकल सुपरिटेन्डेन्ट डा. रामचन्द्र सापकोटाले जानकारी दिए ।