पेरिस । किलियान एमबाप्पेको दुई गोलका बावजुद पनि पीएसजीले हार ब्यहोरेको छ। निससँगको खेलमा पीएसजी २–३ गोलले पराजित भएको हो । नयाँ प्रशिक्षक लुइस एनरिकेको नेतृत्वमा पीएसजीले पहिलो हार बेहोरेको हो ।

तेरेम मोफीले निसलाई २१ औँ मिनेटमा अग्रता दिलाएका थिए तर एम्बाप्पेले ८ मिनेटपछि नै खेल बराबरीमा ल्याए । गेटान लेबोर्डेले दोस्रो हाफमा पाहुना टोलीलाई पुन अग्रतामा फर्काए भने नाइजेरियाका मोफीले १८ यार्डबाट गोल गर्दै अग्रता दोब्बर बनाए ।

एमबाप्पेले खेलको अन्त्यतिर एक गोल फर्काए पनि बराबरी गर्न सकेनन । टोलीमा फर्किएपछि यो सिजन चार खेलमा फ्रान्सेली कप्तानको सातौँ गोल थियो ।

३४ वर्षीय इटालियन फ्रान्सेस्को फारियोलीले व्यवस्थापन गरेको निस तालिकामा पीएसजीलाई उछिन्दै मोनाको पछि दोस्रो स्थानमा पुगेको छ ।