काठमाडौं । नेकपा एमालेको सुदूरपश्चिम प्रदेश अधिवेशनमा अध्यक्षका एक जना उम्मेदवारसहित ३ जनाले उम्मेदवारी पफिर्ता लिएका छन् । निर्वाचन समितिले आज दिउँसो १२ बजेसम्म उम्मेदवारी फिर्ता लिन तोकेको समयतालिकाभित्र अध्यक्षका १ र उपाध्यक्षका २ जना उम्मेदवारले उम्मेदवारी फिर्ता लिएको निर्वाचन समितिले जनाएको छ ।

अध्यक्ष पदमा उम्मेदवारी दिएका कमल तिमिल्सिनाले उम्मेदवारी फिर्ता लिएका छन् । उनलाई पार्टी नेताहरुले केन्द्रीय सदस्य बनाउने बचन दिएपछि उनले उम्मेदवारी फिर्ता लिएको बताइएको छ ।

निवर्तमान कमिटीका उनी उपाध्यक्ष थिए । उनको उम्मेदवारी फिर्ता भएपनि अध्यक्षमा अझै तीन जना उम्मेदवार चुनावी मैदानमा छन् । पूर्व जिविस सभापति कृष्णप्रसाद जैसी, भरतबहादुर साउद र बचनबहादुर सिंहले अध्यक्षमा उम्मेदवारी दर्ता गराएका छन्। जैसी र साउद अछामका हुन्। सिंह भने कञ्चनपुरका हुन् ।

यसैगरी उपाध्यक्षमा उम्मेदवारी दिएका बलदेव रेग्मी र रणबहादुर महराले पनि उम्मेदवारी फिर्ता लिएको निर्वाचन समितिले जनाएको छ ।

उम्मेदवारी फिर्ताको समय आज दिउँसो साढे १२ बजेसम्मका लागि थपिएको छ ।