सर्लाही । सर्लाहीको लालबन्दीमा दुर्घटना भएको छ । विहीबार रातीको समयमा तीव्र गतिको मोटरसाइकल बिग्रेर सडकमा रोकेर राखेको ट्रकमा ठोक्किँदा दुई युवाको मृत्यु भएको छ।

पूर्वपश्चिम राजमार्ग अन्तर्गत लालबन्दी- १७ स्थित कालिञ्जोर पुल नजिक विहिबार राती भएको दुर्घटनामा परि सर्लाहीकै हरिवन नगरपालिका- ११ का दुई युवाको मृत्यु भएको जिल्ला प्रहरी कार्यालय सर्लाहीले जनाएको छ।

मृत्यु हुनेमा हरिवन-११ का २८ वर्षीय मुकेशकुमार गुप्ता र सोही ठाउँका ३५ वर्षीय सुनिलकुमार गुप्ता रहेका छन्।

राति करिब १० बजे ट्रक बिग्रिएपछि गाडी सडकमै छाडेर चालक र सहचालक मर्मतको लागि मिस्त्री खोज्न लालबन्दी बजारतर्फ गएको बेला घटना भएको प्रहरीले जनाएको छ।

दुर्घटनामा परि गम्भीर घाइते भएका मुकेशलाई उपचारको लागि महोत्तरीको बर्दिबास लगिएको थियो। अस्पताल पुर्याउनासाथ चिकित्सकले उनलाई मृत घोषणा गरेका थिए। उनको शव हाल बर्दिबासमै छ। सुनिलको शव भने परीक्षणको लागि प्रादेशिक अस्पताल मलंगवा लगिएको प्रहरीले जनाएको छ।

दुर्घटनापछि इलाका प्रहरी कार्यालय लालबन्दीले ट्रक चालकलाई पक्राउ गरेको छ।