काठमाडौँ । विवाहमा ल्याएको दाइजो कम भएको भन्दै थप दाइजो ल्याउन दबाब दिँदै श्रीमतीलाई यातना दिने इञ्जिनियरलाई प्रहरीले पक्राउ गरेको छ ।

इन्जिनियर ३१ वर्षीय सुमितकुमार गुप्तालाई जिल्ला प्रहरी परिसर ललितपुरले पक्राउ गरेको हो।

धनुषाको जनकपुर– ४ घर भइ ललितपुर–२ सानेपा बस्ने गुप्तालाई पक्राउ गरिएको जिल्ला प्रहरी परिसर, ललितपुरका एसपी नवराज कार्कीले जानकारी दिए ।

उनले २१ मंसिर २०७९ मा बाराकी पुनम कुमारी गुप्तासँग विवाह गरेका थिए। विवाहको समयमा नै उनले २१ लाख रुपैयाँ दाईजो लिएका थिए।

पछि पटक–पटक गरी नौ लाख बराबरका सामान लिएका थिए। त्यसपछि पनि थप दाइजो माग्दै उनले श्रीमतीलाई शारिरीक तथा मानसिक यातना दिदै आएको उजुरीका आधारमा सुमितलाई पक्राउ गरिएको एसपी कार्कीले बताए ।

सुमितकी आमा सुशिला देवी गुप्ताले समेत यातना दिएको उजुरी परेको छ। उनी भने फरार छिन्।

यो घटनामा विवाहमा लेनदेन गर्न नहुने (दाइजो)सम्बन्धी मुद्दामा अनुसन्धान भइरहेको एसपी कार्कीले बताए।