काठमाडौं । असार २२ गते सांझ पूर्वी नवलपरासी, गैडाकोट नगरपालिका-६ बुटवल बजार स्थित नारायणी नदिको भंगालमा माछा मार्ने क्रममा फसेका २ जना व्यक्तिको करिब ५ घन्टा पछि सशस्त्र प्रहरी बलको गोताखोरले सकुशल उद्दार गरेको छ ।

माछा मार्ने क्रममा ३ जना फसेकोमा एक जना पौडिएर बाहिर आएका थिए । बांकी २ जनाको सशस्त्र प्रहरी बल नेपाल बिपद ब्यबस्थापन तालिम शिक्षालय कुरिनटारबाट गएको गोताखोरले शनिबार राती सबा १० बजे सकुशल उद्दार गरेको हो ।

घटना बारे जानकारी पाए पश्चात् सशस्त्र प्रहरी बल नेपाल नं. ३१ गुल्म पुर्बी नवलपरासी बाट १५ जनाको टोली खटाइएकोमा उद्दार हुन नसकेपछी कुरिनटारबाट गोताखोर पठाइएको थियो ।

उद्दार गरिएका हरुमा गैंडाकोट नगरपालिका -५ बस्ने ५० बर्षका ओम बहादुर गुरुङ र ४२ बर्षका खुम बहादुर गुरुङ रहेका छन् । बाढिमा फसेका बर्ष ३५ का रमेश बोट भने आफै पौडिएर निस्किएका थिए ।