काठमाडौं । रामेछाप जिल्लाभित्र पछिल्लो केही दिनयता सवारी दुर्घटना बढेपछि सम्भावित दुर्घटना न्यूनीकरणका लागि जिल्लाको खाँडादेवी गाउँपालिका—३ भीरपानीमा निःशुल्क खाजासहितको विश्रामस्थल सञ्चालन गरिएको छ ।

सम्भावित दुर्घटना न्यूनीकरणका लागि प्रहरी र खाँडादेवी गाँउपालिका-६ माकादुमले यो अभ्यास सुरुआत गरेका हुन् ।

सम्भावित दुर्घटनाको जोखिमलाई मध्यनजर गरी सेवा सञ्चालन गरिएको वडा नम्बर ६ का अध्यक्ष नारायण कार्कीले बताए । 

भीरपानीको सित्खादेखि पकरवासको गोगनपानी डाँडासम्म उकालो र गोगनपानीदेखि भीरपानीको चरीखोलासम्म ओरालो बाटो भएकाले यहाँ दुर्घटनाको जोखिम रहेको छ ।

लामो समयसम्म ड्राइभ गरेपछि इन्जिन तातेर ब्रेक फेल भएर दुर्घटना हुने जोखिम बढेपछि सुरक्षित यात्राको लागि २० देखि २५ मिनेट रोकेर इन्जिन सेलाएपछि यात्रुहरु टाढादेखि आएका हुने र भोक लाग्ने समस्या हुन सक्ने भएकाले नि:शुल्क खाजा ब्यवस्था गरेको ई.प्र.का खाँडादेवीले जनाएको छ ।

जिल्ला ट्राफिक कार्यालय खाँडादेवीले सडक दुर्घटनामा कमी ल्याउन गरेका पछिल्ला गतिविधि एवं प्रयास उपलब्धिमूलक देखिएका छन् ।