काठमाडौं । नेपालमा विद्युतीय गतिशीलतालाई सुदृढ बनाउन कुमारी बैंक लिमिटेड र जीसेलचाफ्ट फर इन्टरनेसनल जुसाममेनारबिट (जीआईजेड)बीच नेपालका लागि दीगो विद्युतीय यातायात परियोजनाअन्तर्गत सहमति (एमओयू)मा हस्ताक्षर भएको छ ।

यो सहकार्यले सार्वजनिक यातायात सञ्चालकलाई सरल वित्तीय पहुँच उपलब्ध गराउँदै विद्युतीय सार्वजनिक यातायात (विशेषगरी विद्युतीय माइक्रो तथा मिनी बसहरू)को स्वीकृति र सञ्चालनलाई तीव्र बनाउन लक्षित वित्तीय संयन्त्र र डिजिटल नवप्रवर्तनलाई सहयोग पुर्‍याउने विश्वास गरिएको छ ।

यो परियोजना जीआईजेड र ग्लोबल ग्रीन ग्रोथ इस्टिच्युट (जीजीजीआई)द्वारा भौतिक पूर्वाधार तथा यातायात मन्त्रालयसहितका सरकारी तथा सम्बन्धित साझेदार संस्थाहरूसँगको सहकार्यमा कार्यान्वयन भइरहेको छ । परियोजना मिटिगेसन एक्सन फ्यासलिटी (एमएएफ)को आर्थिक सहयोगमा सञ्चालन भइरहेको बताइएको छ ।

यस कार्यक्रमले करिब तीन हजार ५०० विद्युतीय मिनीबस सञ्चालनमा ल्याउने लक्ष्य राखिएको छ । जसले नेपालको सार्वजनिक यातायात प्रणालीलाई थप सफा, हरित र दिगो बनाउन योगदान पु‍र्‍याउने बताइएको छ ।

यस पहलले परम्परागत इन्धनमा आधारित सवारी साधनहरूलाई विद्युतीय सवारी साधनहरूमा रूपान्तरण गर्ने उद्देश्य राखेको बताइएको छ ।

यो सहकार्यले सार्वजनिक यातायात व्यवसाय गर्नेहरूलाई विद्युतीय माइक्रो र मिनीबस प्रयोग गर्न सहज बनाउने बैंकबाट जारी विज्ञप्तिमा उल्लेख छ ।