काठमाडौं । नेकपा (एमाले) भित्रको विवाद समाधानको प्रयासका लागि गठन भएको कार्यदलको पहिलो बैठक सकिएको छ । सिंहदरबारमा मंगलबार भएको कार्यदलको बैठकमा कार्यदलको कार्यक्षेत्र, कार्यविधि र आचारसंहिता बनाउने विषयमा केन्द्रीत रहेर छलफल भएकाे कार्यदलमा माधव नेपाल पक्षका संयोजक रहेका भीम रावलले सञ्चारकर्मीलाई जानकारी दिए ।

एमालेमा अध्यक्ष एवं प्रधानमन्त्री केपी शर्मा ओली र वरिष्ठ नेता नेपाल पक्षका विवाद मिलाउन आइतबार दुवै पक्षका ५/५ जना नेता रहेको कार्यदल गठन गरिएको थियो । कार्यदलको बैठक हिजो बस्ने भनिए पनि केही नेताहरुको अस्वस्थताका कारण बस्न सकेको थिएन । आज कार्यदलका सदस्यहरुका बीचमा पहिलो बैठक बसेको हो ।

‘पार्टी एकता र समझदारीलाई वृद्धि गर्न तथा एक-आपसमा अविश्वास, असहयोग र अन्तरविरोध सिर्जना हुने कामबाट अलग रहन पार्टी पंक्तिलाई आह्वान गर्ने निर्णय हामीले लिएका छौं,- कार्यदलको बैठकबाट बाहिरिँदै गर्दा माधव नेपाल पक्षका संयोजक रावलले सञ्चारकर्मीसँग भने । बैठक भोलि पुनः बस्ने तय भएको छ ।

कार्यदलको बैठकमा सहभागी अर्का एक नेताका अनुसार आजको बैठकमा मुख्यतः तीन विषयमा केन्द्रित रहेर छलफल भएका थिए । पहिलो–कार्यदलको कार्यक्षेत्र, कार्यविधि र आचारसंहिता बनाउने , दोस्रो– पार्टीभित्र देखिएका समस्यालाई यथोचित रूपमा समाधान गर्दै पार्टी पंक्तिलाई एकताबद्ध रूपमा अघि बढाउन कार्यदलले सबैसँग सहयोग र सद्भावका लागि आग्रह गर्ने र तेस्रो – पार्टी एकता र समझदारीलाई वृद्धि गर्न तथा एकआपसमा अविश्वास, असहयोग र अन्तरविरोध सिर्जना हुने कामकुराबाट अलग रहन पार्टी पंक्तिलाई आह्वान गर्ने ।

कार्यदलमा ओली पक्षबाट सुवास नेम्वाङको संयोजकत्वमा विष्णु पौडेल, शंकर पोखरेल, प्रदीप ज्ञवाली र विष्णु रिमाल सदस्य तथा माधव नेपाल पक्षबाट रावलको संयोजकत्वमा घनश्याम भुसाल, सुरेन्द्र पाण्डे, गोकर्ण विष्ट र रघुजी पन्त सदस्य रहेका छन्।