नेपाली क्रिकेटका ‘पावर-हिटर’ दीपेन्द्रसिंह ऐरीले विश्व क्रिकेटको मञ्चमा फेरि आफ्नो बलियो उपस्थिति देखाएका छन् ।

आईसीसीले सार्वजनिक गरेको पुरुष टी-२० अलराउन्डरतर्फको नयाँ वरियतामा दीपेन्द्र दुई स्थान सुधार गर्दै विश्वको चौथो नम्बरमा उक्लिएका छन्। 

नेपाली क्रिकेट इतिहासमा कुनै पनि खेलाडीले हात पारेको यो अहिलेसम्मकै उच्च वरियता हो।

विश्वकप २०२६ को समूह चरणको अन्तिम खेलमा स्कटल्यान्डविरुद्धको सानदार प्रदर्शन नै दीपेन्द्रलाई वरियताको शिखर उन्मुख गराउने माध्यम बन्यो। मुम्बईको वानखेडे स्टेडियममा मंगलबार दीपेन्द्रले २३ बलमा ४ चौका र ३ छक्का प्रहार गर्दै नटआउट ५० रन जोडेपछि नेपालले स्कटल्यान्डमाथि ७ विकेटको ऐतिहासिक जित दर्ता गरेको थियो।

जारी विश्वकपमा दीपेन्द्रको त्यो लगातार दोस्रो अर्धशतक थियो। यसअघि उनले वेस्ट इन्डिजविरुद्ध पनि सानदार ब्याटिङ गरेका थिए।