मोरङ । जिल्लाको सुन्दरहरैचा नगरपालिका–३ लोचनीमा एक पुरुषको अर्ध नग्न शव रगताम्मे अवस्थामा भेटिएको छ ।

४० वर्षीय विष्णु ऋषिदेवको सुतेकै ओछयानमा धारिलो हतियार दाउले प्रहार गरेर हत्या गरिएको अवस्थामा शव फेला परेको हो ।

खोला छेउको ऐलानी जग्गामा टिनको छानो भएको र टाटीको बेरा लगाएर बनाइएको झुप्रोमा एक्लै बस्दै आएका ऋषिदेवलाई अर्ध नग्न शब रगताम्मे अवस्थामा फेला पारेको जिल्ला प्रहरी कार्यालय मोरङका प्रवक्ता मान बहादुर राईले जानकारी दिएका छन् ।

सोही ठाउँ बस्ने २३ वर्षीय पुजन राईले निदाएका बेला दाउले घाँटीको अगाडिको भागका काटेर हत्या गरिएको प्रहरीको प्रारम्भिक अनुसन्धानमा खुलेको छ । उनलाई प्रहरीले शुक्रबार विहान ८ बजे उनकै घरबाट प्रहरीले पक्राउ गरेको हो ।

प्रवक्ता राईका अनुसार ज्यालमजदुरी गरेर जीविका चलाउँदै आएका विष्णुकी श्रीमतीको मृत्यु भइसकेको र छोराछोरी पनि घरभन्दा बाहिर नै बस्ने गरेका थिए । उनि दैनिक बिहानै उठेर काममा जाने गरेका थिए।

ढिलासम्म पनि उनी काममा ननिस्किएपछि बोलाउन गएका साथीहरुले घरभित्रै ओछयानमा हत्या गरिएको अवस्थामा शव देखेर प्रहरीलाई खबर गरेको थिए।