अमेरिकी उपराष्ट्रपति जेडी भान्स इरानसँगको वार्ताका लागि पाकिस्तानकाको इस्लामावाद आइपुगेका छन्।

आज इस्लामावादमा अमेरिका र इरानका उच्च अधिकारीहरूबीच औपचारिक वार्ता सुरु हुँदैछ। यस वार्ताको नेतृत्व अमेरिकी उपराष्ट्रपति जेडी भान्सले गरिरहेका छन्। उपराष्ट्रपति भान्ससँगै राष्ट्रपति डोनाल्ड ट्रम्पका विशेष दूत स्टिभ विट्कफ र ज्यारेड कुश्नर सहभागी छन्।

इरानी टोलीको नेतृत्व इरानी विदेशमन्त्री अब्बास अराक्ची र संसदका सभामुख मोहम्मद बागेर गालिबाफले गरिरहेका छन्।

इस्लामावाद आइपुग्नु अघि उपराष्ट्रपति भान्सले इरानलाई चेतावनी दिँदै भनेका छन्, -‘यदि इरान इमानदारीका साथ वार्ता गर्न तयार छ भने हामी हात मिलाउन तयार छौँ, तर यदि उनीहरूले हामीलाई झुक्याउन खोज्छन् भने हाम्रो टोलीले त्यसलाई सहने छैन।’

हर्मुजको जलडमरूको आवागमन , लेबनानमा युद्धविराम, आणविक मुद्दालगायतका जटील विषयमा दुई देशका आ-आफ्ना कडा अडान रहेका छन् । जसले वार्ता निकै जटील रहेको देखाउँछ ।