काठमाडौँ । राष्ट्रिय स्वतन्त्र पार्टी (रास्वपा) को केन्द्रीय समिति बैठक सुरु भएको छ । केन्द्रीय कार्यालय वनस्थलीमा सोमबार दिउँसो सवा ४ बजेदेखि बैठक सुरु भएको हो ।

प्रवक्ता मनिष झाका अनुसार, बैठकमा संगठनात्मक, नीतिगत तथा विधानसम्बन्धी महत्वपूर्ण विषयहरूमा छलफल हुने छ । बैठकको सुरुवात पार्टी गतिविधिबारे विस्तृत व्रिफिङबाट हुने कार्यसूची छ । केन्द्रीय सदस्यहरूको रिपोर्टिङमा २० जनाले दुई–दुई मिनेट बोल्न पाउने भनिएको छ ।

बैठकमा केन्द्रीय समिति पदाधिकारी मनोनयन, महाधिवेशन कार्यविधि मस्यौदा, विधान संशोधनका विषयमा पनि छलफल हुने प्रवक्ता झाले बताए।

आसन्न स्थानीय तहको निर्वाचनका लागि उम्मेदवार क्लब गठन र आवेदन आह्वान, प्रवासमा रहेका नेपालीहरुलाई प्रवासबाटै मताधिकारलगायत विषयमा पनि बैठकमा छलफल हुने उनले जानकारी दिए ।

यस्तै बैठकमा गृहमन्त्री प्रकरणबारे पनि छलफल हुने नेताहरूले जानकारी दिएका छन् । हालै गृहमन्त्री सुधन गुरुङको व्यापारी दीपक भट्टसँग व्यापारिक (सेयर) लगानी रहेको तथ्य बाहिरिएकाे थियाे । यसबारे चाैतर्फी आलाेचना हुन थालेपछि उनले आज सामाजिक सञ्जालमार्फत स्पष्टीकरण दिएका थिए ।

बैठकले पार्टीका सहमहामन्त्री भूपदेव साहलाई महामन्त्री बनाउने तयारी गरेको पनि नेताहरूले बताएका छन्।