काठमाडौं । फिफा विश्वकप–२०२२ तथा एसियन कप–२०२३ अन्तर्गत दोस्रो चरणको छनोटमा नेपाल जोर्डनसँग पराजित भएको छ ।

कुवेतमा गएराती भएको खेलमा नेपाल जोर्डनसँग ३–० गोल अन्तरले पराजित भएको हो ।

कुवेत सिटीस्थित जाबेर अल अहमद अन्तराष्ट्रिय स्टेडियममा खेलको २४ औं मिनेटमा बाहा फाइजलले पेनाल्टीमा गोल गर्दै जोर्डनलाई अग्रता दिलाएका थिए । ४९ औं मिनेटमा फाइजलले नै व्यक्तिगत दोस्रो गोल गर्दै जोर्डनलाई २–० को अवस्थामा पुर्‍याए ।

६७ औं मिनेटमा डिफेन्डर याजनले हेडरबाट गोल गर्दै जोर्डनलाई ३(० को जित दिलाए ।

जितसँगै समूह ‘बी’ को जोर्डन ६ खेलमा १३ अंक जोड्दै अंक तालिकाको दोस्रो स्थानमा उक्लिएको छ । नेपालले ७ खेलमा ६ अंक जोडेको छ । नेपाल चौथो स्थानमा छ । नेपालले समूह चरणको अन्तिम खेलमा शुक्रबार अष्ट्रेलियासँग खेल्नेछ ।