काठमाडौँ । लुम्बिनी प्रदेशका मुख्यमन्त्री शंकर पोखरेलले आफ्नो बहुमत गुमे एक मिनेट पनि सत्तामा नबस्ने बताएका छन् । केही प्रदेश सभाका सरकारको बहुमत गुमाइरहेको अवस्थामा उनले यस्तो दाबी गरेका हुन् ।

जनता समाजवादी पार्टी (जसपा)ले कारबाही गरेपछि पदमुक्त भएका चारजना मन्त्रीको सांसद पद फर्केसँगै उनले आफ्नो पक्षमा बहुमत पुग्ने बताए । सर्वोच्च अदालतको आदेशसँगै चार जना मन्त्रीको सांसद पद फर्किको थियो ।

‘म संसदभित्रको राजनीतिक गणितमा विश्वास गर्छु, जबसम्म राजनीतिक रुपमा सत्तापक्षमा बहुमत रहन्छ म मुख्यमन्त्री रहन्छु’ मुख्यमन्त्री पोखरेलले भने, ‘म अराजनीतिमा विश्वास गर्दिनँ, राजनीतिक रुपमा बहुमत गुम्यो भने एक मिनेट पनि बस्दिनँ ।’

८३ सदस्यीय प्रदेश सभामा नेकपा एमालेतर्फका ३८ सांसद छन् । गत वैशाख १९ गते उनले आफ्नो पार्टीसँग एकल बहुमत रहेको बताउँदै संविधानको १६८(१)अनुसार पुनः मुख्यमन्त्री नियुक्त भएका थिए ।

तर, पछिल्लो राजनीतिक घटना क्रममा एमालेका माधव नेपाल र झलनाथ खनाल सत्ताको विपक्षमा भएकाले बहुमत नपुग्ने देखिएको छ । विपक्षी दलहरु नेपाली कांग्रेस, नेकपा माओवादी केन्द्र, जसपा र राष्ट्रिय जनमोर्चाले गत वैशाख ६ गते मुख्यमन्त्रीविरुद्ध प्रदेश सभामा अविश्वास प्रस्ताव दर्ता गरेका थिए ।

उक्त प्रस्तावमाथि छलफलका लागि वैशाख १९ गते संसदको विशेष अधिवेशन बोलाइएसँगै पोखरेलले राजीनामा दिए र सोही दिन पोखरेलले विशेष अधिवेशन अन्त्य गराएका थिए ।

त्यसपछि एकल बहुमतको मुख्यमन्त्री नियुक्त भएपछि सत्ता पक्ष र विपक्षी दलबीच राजनीतिक टकराव जारी छ ।

विपक्षी गठबन्धनले ४२ जना सांसदको हस्ताक्षरसहित बहुमत देखाएर माओवादी केन्द्रका कूलप्रसाद केसीलाई मुख्यमन्त्री बनाउनु पर्ने माग राख्दै आन्दोलन भएको थियो । यस्तै, पोखरेलको सपथ रोक्न राति ८ बजेसम्म प्रदेश प्रमुख कार्यालयमा धर्ना बसेका थिए । विपक्षी गठबन्धनले गत वैशाख २६ गते दोस्रोपटक मुख्यमन्त्रीविरुद्ध अविश्वासको प्रस्ताव दर्ता गरेको छ । तर, त्यसले वैधानिकता पाएको छैन ।