काठमाडौँ । प्रधानमन्त्री केपी शर्मा ओलीले तरल अक्सिजन प्लान्टको भर्चुअल माध्यमबाट शिलान्यास गरेका छन् । उनले प्रधानमन्त्री निवास बालुवाटारबाट रुपन्देहीको सिमरहवामा स्थापना गरिएको देशकै पहिलो तरल अक्सिजन प्लान्टको शिलान्यास गरेका हुन् ।

शिलान्यास गर्दै उनले कोरोना भाइरस (कोभिड–१९) महामारीको दोस्रो लहर शुरु भएपछि अक्सिजनको अभाव व्यहोरेको उल्लेख गर्दै प्लान्टको स्थापना असाधारण खुशीको विषय भएको बताए ।

‘दोस्रो लहरले हामीलाई एक्कासी अक्सिजन, सिलिण्डरको अभाव ग्रस्त बनायो, त्यतिबेला हामीले महंगो मूल्य तिरेरै पनि अक्सिजन सिलिण्डर किन्यौँ,’ उनले भने ।

महामारीका समयमा अक्सिजन प्लान्टले नपुग्ने देखिएकाले तरल अक्सिजन प्लान्ट राख्ने निष्कर्षमा सरकार पुगेको उनको भनाइ थियो । प्रधानमन्त्री ओलीले दोस्रो लहर उचाइमा चढिरहेका बेला तरल अक्सिजन प्लान्ट राख्ने उद्योगी शंकर अग्रवालको प्रयास सराहनीय एवं देशप्रति उत्तरदायी भावनायुक्त भएको बताए ।

उनले कोरोना महामारीबाट अभिभावकविहीन भएका बालबालिकालाई के गर्न सकिन्छ भन्नेमा विचार भइरहेको जानकारी दिए । ‘महामारीले अभिभावक गुमाएका बालबालिकालाई के गर्ने भन्नेबारेमा अध्ययन हुँदैछ र त्यसअनुसार आवश्यक कदम चालिनेछ,’ उनले भने ।

अक्सिजन प्लान्ट स्थापना र सञ्चालनलाई सफल पार्न भन्सार छुटलगायतका सहयोग गर्न सरकार तयार रहेको जानकारी पनि उनले दिए ।

रुपन्देहीको सिमरहवामा स्थापित उक्त प्लान्टबाट दैनिक ६० मेट्रिक टन अक्सिजन उत्पादन हुन्छ । त्यसबाट दैनिक ७ हजार ठूला सिलिण्डरमा अक्सिजन भर्न सकिन्छ ।