काठमाडौँ । गण्डकी प्रदेशका मुख्यमन्त्री कृष्णचन्द्र नेपाली पोखरेलले आगामी शुक्रबार विश्वासको मत लिने भएका छन् । उनले विश्वासको मत लिने तयारी गरेका हुन् ।

गत जेठ २८ गते मुख्यमन्त्रीमा नियुक्त भएका पोखरेलले विश्वासको मत लिएसँगै मन्त्रिपरिषद् विस्तार गर्ने योजना बनाएका छन् । उनले असार ४ गते शुक्रबार विश्वासको मत लिने भएका हुन् ।

विश्वासको मत लिनुभन्दा दुई दिनअघि संसदलाई सरकारले जानकारी दिनु पर्ने संवैधानिक व्यवस्था भएकाले संसद सचिवालयमा उनले विश्वासको मतका लागि सूचना दर्ता गराएका छन् ।

पोखरेल नेपाली कांग्रेस, नेकपा माओवादी केन्द्र, जनता समाजवादी पार्टी, राष्ट्रिय जनमोर्चा र एक स्वतन्त्र सांसदको गठबन्धमा मुख्यमन्त्री बनेका हुन् ।

संविधानको धारा १६८ (५)अनुसार मुख्यमन्त्रीमा नियुक्त भएको ३० दिनभित्र विश्वासको मत लिनु पर्ने व्यवस्था रहेको छ ।