काठमाडौँ । नेपाली कांग्रेसको १४ औँ महाधिवेशन नकिँदै गर्दा नेताहरूबीच भेट वार्ता बढ्न थालेको छ । पार्टी शेरबहादुर देउवाले आगामी महाधिवेशनमा आफूले पुनः सभापतिमा उम्मेदवारी दिने बताएसँगै विपक्षी पक्षका नेताहरूले भेट वार्तामा जोड दिएका हुन् ।

यस क्रममा पार्टी उपसभापति विमलेन्द्र निधिले आगामी महाधिवेशनका सभापतिमा दाबेदार दुई नेताहरू महामन्त्री शशांक कोइराला र पूर्वमहामन्त्री प्रकाशमान सिंहलाई बोलाएर वार्ता गरेका छन् । यी तीन भाइको वार्ताले महाधिवेशनमा देउवलाई टक्कर दिने भएका छन् ।

सभापति देउवाले महाधिवेशनको तयारी गर्दै प्रदेश–प्रदेशका आफूनिकटका केन्द्रीय सदस्यसँग छलफल गरिरहेको अवस्थामा निधिले दुई प्रभावशाली नेतालाई आफ्नो निवासमा बोलाएर वार्ता गरेका हुन् ।

महाधिवेशनमा देउवालाई चुनौती दिन सक्ने यी तीन नेताको वार्तालाई पार्टीभित्र अर्थपूर्ण रुपमा हेरिएको छ । गत शनिबार देउवालाई भेटेर सभापतिमा उठ्नेबारे निधिले जानकारी गराएका थिए ।

सभापतिमा पुनः उठ्ने तयारी गरेसँगै देउवालाई साथ दिँदै आएका निधि असन्तुष्ट बन्दै गएका छन् । उनले विपक्षी पक्षसँग छलफल बढाउँदै गर्दा देउवा आफ्नै तयारीमा व्यस्त हुँदै आएका छन् ।

दुई घण्टाभन्दा बढी छलफलमा जुटेको निधि, कोइराला र सिंहले आगामी महाधिवेशनबारे गम्भिर वार्ता गरेका छन् ।

यसका साथै उनीहरूले विपक्षी गठबन्धनबाट देउवालाई प्रधानमन्त्री बनाउन सहयोग गर्ने सहमति गरेको स्रोतले जनाएको छ ।