काठमाडौँ । राष्ट्रिय प्रजातन्त्र पार्टी (राप्रपा)की नेतृसमेत रहेकी नायिका रेखा थापाले पार्टीको निर्णयप्रति असहमति जनाएकी छन् ।

राप्रपाका अध्यक्षत्रय पशुपति शमशेर जबरा, प्रकाशचन्द्र लोहनी र कमल थापाले केन्द्रीय विशेष समिति गठन गररेपछि थापाले असहमति जनाएकी हुन् ।

राप्रपाप्रति थापाले विभिन्न प्रश्न तेर्स्याएकी छन् । “कुन राप्रपाले देश हाँक्ने हो ? कुन राप्रपा वैकल्पिक शक्ति बन्ने हो ? कुन राप्रपा मौलिक रुपमा सबैको पार्टी हो ? कुन राप्रपा उदाउँदो राप्रपा हो ?” थापाले प्रश्न गरेकी छन् “कुन राप्रपा नाम मात्रको पार्टी हो ? कुन राप्रपा व्यवहारमा वयस्क र रिटायर्डहरुको सरोकार समूह मात्र हो ? कुन राप्रपा हामी सबैको राप्रपा हो ?”

कुन चाहिँ राप्रपाले देश हाँक्ने हो ? त्यो राप्रपा जस्ले देशमा को को मान्छे बस्छन् थाहा पाएको हुन्छ, न्युनतम लैंगिक साक्षरता राख्छ, मौलिक वैचारिक नमुना पेस गर्छ, सभ्यताको माग अनुसार इतिहासलाई उन्नत व्याख्या गर्छ, युवा र श्रमिक वर्गमा स्थापित हुँदै जान्छ र संस्थालाई लोकतान्त्रिकरण गर्छ भन्ने थापाको प्रश्न रहेको छ ।

राप्रपा जो महिलालाई बहिष्करणको नमुना देखाउँछ, मजदुर, किसान, श्रमिक र युवासँग डराउँछ, विरासतको रुपमा राजनीतिलाई कोठे बनाउँछ, बहसमा उत्रिँदैन सम्झौतावादी राजनीति गर्छ, अवैज्ञानिक रुपमा पार्टी सञ्चालन गर्छ, आत्मसुरक्षाभन्दा अरु सोच्दैन र सधैं रक्षात्मक सोचले ग्रस्त हुन्छ, जनप्रिय मान्छे लत्याउने र आर्थिक हैसियतमा निर्णय गर्नेप्रति आपत्ति जनाएकी छन् ।