काठमाडौं । नेकपा एमाले कार्यदलको बैठक जारी रहेको छ । सिंहदरबारस्थित अर्थमन्त्रालयमा १ बजेदेखि बैठक जारी रहेको छ । बैठकबाट नेता शंकर पोखरेल र रघुजी पन्त बाहिरिएका छन् । बैठकपछि पत्रकारसँग बोल्दै पोखरेलले पार्टी एकता एक दुई दिनभित्रै टुंग्याउने बताएका छन् ।

सहमतिको अधिकतम प्रयास भइरहेको भन्दै उनले सम्भवतः आज भोलि नै एकताको काम सकिखने बताए । यस्तै नेता पन्तले एकता आजै टुंग्याउने गरी सकारात्मक छलफल भइरहेको बताए ।

उनले भने, ‘पार्टी एकतालाई कसरी अगाडि बढाउन सकिन्छ भनेर सबै साथीले आ-आफ्नो विचार राख्नुभयो । सबैका धारणा र विचारहरूलाई राखेर मस्यौदालाई पूर्ण बनाउने प्रयास भइरहेको छ । आजै सकौं भनेर प्रयासरत छौं । सहमतिको मस्यौदालाई अन्तिम रूप दिने काम भइरहेको छ । मस्यौदामा भएका बुँदाहरू अहिले सार्वजनिक गर्ने बेला भएको छैन ।’

पार्टी एकताका लागि तयार गरेका मस्यौदा फाइनल गरेर पार्टी अध्यक्ष केपी शर्मा ओली र वरिष्ठ नेता माधव कुमार नेपाल सहमति भएपछि सार्वजनिक गरिने उनले बताए ।