काठमाडौँ । अर्थ मन्त्रालयले कोरोना भाइरस (कोभिड–१९)विरुद्धको खोप किन्न स्वास्थ्य तथा जनसंख्या मन्त्रालयलाई ५ अर्ब रुपैयाँ दिने भएको छ । अर्थमन्त्री जनार्दन शर्माले बुधबार पदभार ग्रहण गर्दै कोभिडविरुद्धको खोप किन्न बजेट दिने सहमति पत्रमा हस्ताक्षर गरेका हुन् ।

मन्त्रालयका प्रवक्ता महेश आचार्यका अनुसार स्वास्थ्यबाट आइसीयू, एचडीयू तथा भेन्टिलेटर खरिद भई भुक्तानीका लागि माग आएको ९६ करोड १२ लाख रुपैयाँ उपलब्ध गराउने सम्बन्धी फाइल समेत सदर भएको छ ।

प्रादेशिक र स्थानीय अस्पताललाई सहमतिअनुसार ५२ करोड ४६ लाख रुपैयाँ उपलब्ध गराउन समेत अर्थले फाइल सदर गरेको छ ।

यस्तै, कोभिडसम्बन्धी विभिन्न दायित्व, अस्पतालको सोधभर्ना र जोखिम भत्तासमेतका लागि संघीय स्तरका लागि ५६ करोड ४१ लाख र प्रदेश र स्थानीय तहमा जाने गरी ३७ करोड २४ लाख रुपैयाँ निकासाको फाइल अर्थमन्त्री शर्माले हस्ताक्षर गरेका छन् ।