काठमाडौँ । फ्ल्याट भाडामा लिएर यौन धन्दा सञ्चालन गराउँदै आएकी दुई जनालाई प्रहरीले पक्राउ गरेको छ । पक्राउ पर्नेमा गोरखाको बारपाक सुलिकोट गाउँपालिका ३ घर भएकी प्रिती थापा मगर र झापाको गौरादह नगरपालिका ५ घर भएकी ज्योती पोमु रहेकी छन् ।

अदालतको आदेशअनुसार उनीहरूलाई पुर्पक्षका लागि केन्द्रीय कारागार जगन्नाथदेवलमा पठाइएको मानव बेचविखन अनुसन्धान ब्युरोले जनाएको हो ।

उनीहरूले केही केटीहरूलाई वेश्यावृत्तिमा लगाएका थिए । त्यसैमध्येकी एक किशोरी भागेर ‘नेप्लिज होम’ नामक संस्थाको सम्पर्कमा पुगेकी थिइन् । सोही माध्यमबाट मानव बेचविखन अनुसन्धान ब्युरोले गत असार २१ मा प्रितीलाई र असार ३० मा ज्योतीलाई पक्राउ गरेको हो ।