काठमाडौँ । नेपाली कांग्रेसका नेताहरूको बैठक बस्ने भएको छ । पार्टी सभापति शेरबहादुर देउवा निवास बुढानीलकण्ठमा बुधबार दिउँसो शीर्ष नेताहरुको बैठक बस्ने भएको हो । बैठकमा क्रियाशील सदस्यता विवादबारे छलफल हुने बताइएको छ ।

बैठकमा सभापति देउवा, वरिष्ठ नेता रामचन्द्र पौडेल र पूर्वमहामन्त्री कृष्णप्रसाद सिटौला, सहमहामन्त्री डा. प्रकाशशरण महत, केन्द्रीय सदस्य डा. मिनेन्द्र रिजाल र रमेश लेखक सहभागी हुने भएका छन् ।

रमेश लेखकको संयोजकमा गठन भएको क्रियाशील सदस्यता छानविन समितिले सहमति गर्न नसकेको विवाद समाधान गर्न पार्टी पदाधिकारी बैठकले तीन जना शीर्ष नेतालाई जिम्मा दिएको थियो । यसका लागि पाँच दिनको समय दिइएको थियो ।

हिजो मंगलबार पाँच दिन पूरा भएसँगै आज बैठक बस्न लागिएको हो । तर, विवाद समाधान हुन सकेको छैन । क्रियाशील सदस्यता छानविन समितिले गत १२ १२ गते पार्टी सभापति देउवालाई सदस्यताको अन्तिम प्रतिवेदन बुझाइसकेको छ ।

प्रतिवेदनमा बारा, सप्तरी, धनुषा ४, सर्लाही २, रसुवा सिन्धुपाल्चोकलगायत केही जिल्लामा नयाँ र समायोजनबाट आएका क्रियाशील सदस्यता विवाद समितिले सुल्झाउन सकेको थिएन ।