काठमाडौं । सत्तारूढ गठबन्धनको कार्यदलले सरकार सञ्चालनका लागि तयार गरेको न्यूनतम साझा कार्यक्रम र कार्यविधि आज सार्वजनिक गर्ने भएको छ।

प्रधानमन्त्री निवास बालुवाटारमा शनिबार बसेको सत्ता गठबन्धनको बैठकले आज उक्त कार्यविधि सार्वजनिक गर्ने निर्णय गरेको थियो । उक्त प्रतिवेदन अपरान्ह सिंहदरबारबाट सार्वजनिक गर्ने राष्ट्रिय जनमोर्चाकी सांसद दुर्गा पौडेलले बताइन् ।

कार्यदलले गठबन्धनको न्यूनतम साझा कार्यक्रम र कार्यविधि प्रतिवेदन प्रधानमन्त्री शेरबहादुर देउवालगायत गठवन्धनमा आवद्ध दलका शीर्ष नेतृत्वलाई शुक्रबार हस्तान्तरण गरेको थियो ।

संयुक्त सरकारको साझा न्यूनतम कार्यक्रम नाम दिइएको उक्त प्रतिवेदनमा संयुक्त सरकारका प्राथमिकतालाई समावेश गरिएको छ।

यद्धपी उक्त प्रतिवेदनमा भएका केही बुँदा भने प्रतिवेदन सार्वजनिक नहुँदै विवादित बनेका छन् । विशेषगरी संविधान संशोधन गरेर स्थानीय तहलाई प्रदेश मातहत ल्याउने विषय विवादित बनेको हो ।

उक्त विषयको विरोेधमा शनिबार काठमाडौंमा पत्रकार सम्मेलन गरेर नै स्थानीय तहका जनप्रतिनिधिले सच्याउन माग गरेका छन् ।