मकवानपुर । मकवानपुर जिल्लाको थाहा नगरपालिका उत्कृष्ट नगरपालिका बनेको छ । गत वर्षमा जस्तै जस्तै यस वर्ष पनि जिल्लामै उत्कृष्ट नगरपालिका बनेको हो ।

जिल्ला समन्वय समितिको छैठौँ जिल्ला सभाको अवसरमा थाहा नगरपालिकालाई जिल्लाका स्थानीय तहमध्ये उत्कृष्ट घोषणा गरेको हो । यो घोषणासँगै थाहा नगर लगातार तीनपटक उत्कृष्ट स्थानीय तह बन्न सफल भएको छ ।

जिल्ला समन्वय समितिको मूल्यांकनका आधारमा हुने उक्त घोषणा छैठौँ जिल्ला सभाको कार्यक्रममा हेटौँडामा घोषणा गरिएको हो । उत्कृष्ट बनेको उक्त नगरलाई बागमती प्रदेशका मुख्यमन्त्री डोरमणि पौडेलले नगर प्रमुख लवशेर विष्ट र उपप्रमुख खड्ग गोपालीलाई सम्मान पत्र हस्तान्तरण गरेका थिए ।

कार्य प्रगति तथा स्थानीय तह संस्थागत क्षमता स्वमूल्यांकन कार्यविधि २०७७ को अंक भारलाई समेत आदार मानेर जिल्ला समन्वय समिति मकवानपुरले पुरस्कृत गरेको हो । जिल्ला समन्वय समिति प्रमुख रघुनाथ खुलालका अनुसार थाहा नगरले ७५.५ अंक प्राप्त गरेको छ ।

थाहा नगरको सफलतासँगै नगर प्रमुख विष्टले जनप्रतिनिधि तथा कर्मचारीमा आभार व्यक्त गरेका छन् । नगरको सफलता नै सबै नगरबासीको सफलता भएको बताउँदै उनले आगामी दिनमा थप उचाई प्राप्त गर्न सहयोगको आवश्यकता रहेको बताए ।