काठमाडौं । राष्ट्रिय खेलकुद परिषद्ले बनाएको छानबिन समितिले आफ्नो प्रतिवेद बुझाएको छ । समितिले राष्ट्रिय खेलकुद परिषद्का सदस्य सचिव रमेशकुमार सिलवाललाई आफ्नो प्रतिवेदन बुझाएको छ ।

समितिले नेपाली राष्ट्रिय फुटबल टिमका मुख्य प्रशिक्षक अब्दुल्लाह अल्मुताइरीलाई विवाद सृजना हुने गतिविधि नगर्न सचेत गराउन सिफारिस गरेको छ । छानबिन समितिले मुख्य प्रशिक्षक अल्मुताइरीले अखिल नेपाल फुटबल (संघ) एन्फासँग गरेको सम्झौता अनुसारका कार्य मात्र गर्नुपर्ने र विवाद सृजना हुने खालका कुनै पनि गतिविधि नगराउन सचेत गराउन प्रतिवेदनले सञ्चारमाध्यम र सामाजिक सञ्जालमा कोही व्यक्ति, पदाधिकारी, अफिसियल, पत्रकार तथा अन्य कसैप्रति लक्षित गरी धारणा राख्न पनि अल्मुताइरीलाई रोक लगाउनुपर्ने सुझाव दिएको छ ।

प्रतिवेदन बुझ्दै सदस्य सचिव सिलवालले प्रतिवेदनको विस्तृत अध्ययनपछि मात्र यथार्थ बताउन सक्ने बताए । समितिले बुझाएको प्रतिवेदनमा एन्फालाई आफ्नो समस्या आफैं समाधान गर्न सुझाव दिइएको छ ।

यसैबीच राष्ट्रिय खेलकुद परिषदले बनाएको छानबिन समितिले आफ्नो प्रतिवेदन बुझाए लगत्तै नेपाली राष्ट्रिय फुटबल टिमका प्रशिक्षक अब्दुल्लाह अल्मुताइरीले असन्तुष्टि जनाएका छन् । उनले सामाजिक सञ्जालमा लेख्दै असन्तुष्टि जनाएका हुन् । उनले सामाजिक सञ्जालमा लेखेका छन्, ‘आइ एम आउट ‘। लेट पोलिटिक्स वर्क’ । (म बाहिर भएँ, राजनीतिलाई काम गर्न दिऊँ) ।

उनले यसअघि राष्ट्रिय फुटबल टिमको प्रमुख प्रशिक्षकबाट राजीनामा दिने घोषणा गरेका थिए । उनले नेपाल फुटबल संघ एन्फाका वरिष्ठ उपाध्यक्ष पंकजविक्रम नेम्वाङका कारण राजीनामा दिएको बताएका थिए । त्यसपछि फुटबलमा विवाद बढेको थियो ।