काठमाडौँ । ताप्लेजुङमा चार महिनापछि निषेधाज्ञा हटेको छ । जिल्लास्थित कोरोना संकट व्यवस्थापन समितिको मंगलबार बसेको बैठकमा प्रमुख जिल्ला अधिकारी उमेश पाण्डेले जिल्लामा संक्रमणको अवस्था सामान्य बन्दै गएकाले आजदेखि निषेधाज्ञा हटाएका हुन् ।

जिल्लामा सक्रिय कोरोना संक्रमितको संख्या दुई सयभन्दा कममा झरेको र दैनिक संक्रमित हुने दरमा कमी आउन थालेकाले तत्कालका लागि निषेधाज्ञाको समय थप नगर्ने निष्कर्षमा पुगेको प्रजिअ पाण्डेले बताए । जिल्ला कोरोना संकट तथा व्यवस्थापन समितिका संयोजकसमेत रहेका उनले बुधबारदेखि लागू हुने गरी निषेधाज्ञा हटाएको तर स्वास्थ्य सुरक्षाका मापदण्डलाई अनिवार्य पालना गर्नु पर्ने बताए ।

उनले मास्क र स्यानिटाइजरको प्रयोग तथा भौतिक दूरी कायम गर्नेजस्ता स्वास्थ्य सुरक्षा मापदण्डको पालना सबै नागरिकले अनिवार्य गर्नु पर्ने बताए । उनका अनुसार मास्क नलगाएको र भौतिक दूरी कायम नगरिएको पाइएमा प्रारम्भिक रुपमा प्रतिव्यक्ति एक सय रूपैयाँ जरिवाना हुने जानकारी दिए ।

बाँकी स्वास्थ्य सुरक्षा मापदण्ड उल्लंघन गरेमा संक्रमक रोग निवारण ऐनअनुसार कारबाही हुने सम्बन्धित सबै पक्षलाई सचेत गराएका छन् ।