काठमाडौं । सरकारले चालु आर्थिक वर्षको बजेटलाई परिमार्जन गरी संशोधित बजेट पेश गरेको छ ।

बजेट अध्यादेशले ल्याएको बजेट परिमार्जन गर्दै सरकारले १६ खर्ब ३२ अर्ब ८३ करोड रुपैयाँको बजेटको प्रतिस्थापन विधेयक ल्याएको छ ।
अर्थमन्त्री जनार्दन शर्माले प्रतिष्थापन विधेयक प्रस्तुत गरेका हुन् ।

बजेटमार्फत ऋणको लक्ष्य ३७ अर्बले घटाइएको छ ।

कुल बजेट मध्ये संघीय सरकारको चालु खर्चतर्फ ६ खर्ब ७७ अर्ब ९९ करोड अर्थात् कुल बजेटको ४१ दशमलब ५२ प्रतिशत बिनियोजन गरिएको छ । पूँजीगत तर्फ ३ खर्ब ७८ अर्ब १० करोड अर्थात् २३ दशमलब १६ प्रतिशत छुट्याइएको छ।

त्यस्तै, वित्तीय व्यवथापन तर्फ १ खर्ब ८९ अर्ब ४४ करोड अर्थात् ११ दशमलब ६० प्रतिशत बिनियोजन गरिएको छ ।

प्रदेश र स्थानीय तहमा बित्तीय हस्तान्तरण तर्फ ३ खर्ब ८७ अर्ब ३० करोड अर्थात् २३ दशमलब ७२ प्रतिशत छुट्याइएको छ।
सरकारले चालु आर्थिक वर्ष २०७८/०७९ मा ७ प्रतिशतको आर्थिक वृद्धि हुने अनुमान लगाएको छ ।

अनलाइन मिडियालाई पनि लोक कल्याणकारी विज्ञापन दिने

संशोधित बजेटमा सरकारले अनलाइन मिडियालाई पनि लोक कल्याणकारी विज्ञापन दिने जनाएको छ ।

शुक्रबार एमालेको अवरोधका बीच प्रतिस्थापन विधेयक पेश गर्दै अर्थमन्त्री जनार्दन शर्माले अनलाइन मिडियालाई पनि लोक कल्याणकारी विज्ञापन दिने जानकारी दिए ।

कोरोनाविरुद्धको खोप खरिदका लागि थप ५ अर्ब

संधोधित बजेटमार्फत सरकराले भत्ता कटौती गर्दै सरकारले कोरोनाविरुद्धको खोप खरिदका लागि बजेट विनियोजन गरेको छ ।

अर्थमन्त्री शर्माले प्रतिस्थापन विधेयकमार्फत भत्ता कटौती गर्दै थप ५ अर्ब कोरोनाविरुद्धको खोप खरिदका लागि विनियोजन गरेका छन् ।

यसैगरी, सरकारले राजनीतिक परिवर्तनको आन्दोलनमा बलिदान गर्नेहरुलाई मासिक ३ हजार रुपैयाँ भत्ता दिने घोषणा गरेको छ ।

संसदमा बजेट अध्यादेशको प्रतिस्थापन विधेयक प्रस्तुत गर्दै अर्थमन्त्री जनार्दन शर्माले शहीद परिवारलाई ३ हजार भत्ता उपलब्ध गराउने घोषणा गरेका छन् ।