काठमाडौं । नेपाली उद्योगी व्यापारीहरुको संस्था नेपाल चेम्वर अफ कमर्सले धेरै भन्दा धेरै अनलाइन मिडियाले आफू अनुकुलको शेयरबजार सम्बन्धि समाचार सम्प्रेषण गरेको भन्दै नियन्त्रण गर्न सुझाव दिएको छ ।

पूँजी बजारसँग सम्बन्धित समाचार सम्प्रेषण गर्ने मिडियाले नेपाल धितोपत्र बोर्डबाट अनुमति लिनुपर्ने वा नेपाल धितोपत्र बोर्डले यस सम्बन्धमा कोड अफ कन्डक्ट बनाई लागू गर्नुपर्ने सुझाव दिएको छ ।

अहिले धेरै भन्दा धेरै अनलाइन मिडियाहरु सञ्चालनमा आएको र शेयर बजारका बारेमा आफू अनुकुल वा विभिन्न व्यक्ति वा समुहको हितमा शेयर बजार सम्बन्धि समाचारहरु सम्प्रेषण तथा प्रकाशन गर्ने गरेको चेम्बरको आरोप छ ।

आफूखुशी बजार विश्लेषण गर्दा बजारमा साना तथा नयाँ लगानीकर्ताहरुमा थप अन्यौलता पर्ने गरेको उसले जनाएको छ ।

साथै नेपाल स्टक एक्सचेञ्ज तथा नेपाल धितोपत्र बोर्ड नेतृत्वविहिन हुँदा बजारमा अनेक किसिमका विकृतिहरु देखा परेको र नीतिगत रुपमा सम्बोधन हुनुपर्ने एजेन्डाहरु सम्बोधन नहुँदा बजार अनिर्णयको अवस्थामा पुगेको भन्दै छिटोभन्दा छिटो ती निकायहरुको विवाद समाधान गरि नयाँ नेतृत्व ल्याउन पनि चेम्बर अफ कमर्शले सुझाव दिएको छ ।