काठमाडौँ । जुम्लाको गुठीचौर गाउँपालिकाले एकल पुरुषलाई भत्ता दिने भएको छ । गाउँपालिकाले चालू आर्थिक वर्ष ०७८–७९ मा एकल पुरुषलाई भत्ता दिने घोषणा गरेको हो ।

गाउँपालिका अध्यक्ष हरिबहादुर भण्डारीले ४१ वर्षदेखि ५९ वर्षसम्मका एकल पुरुषलाई भत्ता दिने जानकारी दिएका हुन् । उनका अनुसार उनीहरूलाई मासिक दुई हजार रुपैयाँ भत्ता दिने भएको हो । यसका लागि ७ लाख रुपैयाँ बजेट विनियोजन गरिएको उनले जनाए ।

नेपाल सरकारले ६० वर्षमाथिका ज्येष्ठ नागरिक, एकल महिला, बालबालिका र अपांगता भएका व्यक्तिलाई सामाजिक सुरक्षा भत्ता दिँदै आएको छ । तर, गुठीचौर गाउँपालिकाले एकल पुरुषलाई समेत भत्ता दिने व्यवस्था गरेको हो ।