काठमाडौँ । भारतबाट ठूलो परिमाणमा फूल आएपछि नेपाली व्यवसायी मारमा परेका छन् । काठमाडौँको नयाँ सडक क्षेत्रमा देखिएको फूलको व्यापारमा अधिकांश भारतीय फूल देखिएको छ ।

भारतीय फूल प्रतिमाला दुई हजार रुपैयाँसम्म बिक्री हुँदा आएको छ । तर, स्वदेशमा नै उत्पादन भएको फूलको माला पाँच सय रुपैयाँमा समेत बिक्री हुन मुस्किल भएको व्यापारीले गुनासो गरेका छन् ।

काठमाडौँमा लक्ष्मी र गोबर्धन पुजाको दिन सयपत्री, मखमलीलगायत फूलको बिक्री अधिक मात्रामा हुने गरेको छ । कात्तिक पहिलो साता देशभर परेको बेमौसमी वर्षाले मुख्य कृषि बालीसँगै फूल खेतीमा क्षति भएको थियो ।

काठमाडौँ उपत्यकाका वरिपरीका साथै तराईका विभिन्न क्षेत्रमा व्यवसायिक फूलको खेती हुने गरेको छ । फूल बेच्नका लागि काठमाडौँमा छिमेकी जिल्लाहरु नुवाकोट, धादिङ, काभ्रेपलाञ्चोकबाट किसान तथा व्यापारी आउने गर्छन ।

यो वर्षको तिहारमा फूलमालाको माग बढ्ने र यसको प्रत्यक्ष लाभ नेपाली किसानले गर्ने अनुमान गरिएको थियो । तर, बेमौसमी वर्षाका कारण नेपाली किसानले लगाएको फूल बारीमै नष्ट भएपछि भारतीय फूलको माग बढेको हो ।

नेपाली बजारमा वार्षिक करिब ३ अर्ब रुपैयाँ बराबरको फूल कारोबार हुँदै आएको छ ।