काठमाडौं । नेपाली कांग्रेसको लामो समयदेखि क्रियाशील विवाद देखिएर रोकिएको प्रदेश २ का आठ जिल्ला मध्ये सात जिल्लाको वडा अधिवेशन कार्तिक २७ गते हुने भएको छ । प्रदेश २ का पर्सा , बारा, सर्लाही, महोत्तरी, धनुषा, सप्तरी र सप्तरीको क्रियाशील विबाद टुङ्गिएपछि कार्तिक २७ गते वडा अधिवेशन हुने भएको हो ।

तर यही प्रदेशको रौतहटमा भने अझै क्रियाशील विबाद मिलेको छैन् । एक सय दिनदेखि पार्टी कार्यालयमा धर्ना बसेकाहरूका रौतहटका कांग्रेस नेताहरुको माग सम्बोधन गर्न संस्थापन पक्ष तयार नभएपछि अझै सदस्यता विवाद टुङ्गिएको छैन ।

कांग्रेस निर्वाचन समितिले समेत प्रदेश २ को रौतहट बाहेका अन्य बिवादित १२ जिल्ला सिन्धुपाल्चोक, डोल्पा, बाँके, कैलाली सुर्खेतसहित प्रदेश २ का सात जिल्लामा निर्वाचन अधिकृत खटाएको छ ।

निर्वाचन समितिका संयोजक महादेवप्रसाद यादवले प्रदेश २ का रौतहट बाहेका जिल्लामा अधिवेशन गराउँन निर्वाचन अधिकृत खटाईसकेको जानकारी दिए ।

१३ औँ महाधिवेशनमा धनुषाको क्षेत्र नम्बर ५ लाई महाधिवेशनमा सहभागी हुनबाट बञ्चित भएको थियो । १४ औं महाधिवेशनमा रौतहट भाग लिन पाउँने कि नपाउँने विषयमा पनि केन्द्रीय कार्यसमितिको बैठकले निर्णय गर्ने बताइएको छ ।

त्यसैगरी, प्रदेश २ का अधिवेशन मिति तोकिनु भन्दा अघि देखिनै जिल्ला सभापतिका आकांक्षी भने अघि सरिसकेका थिए ।

अहिलेको प्रदेश २ का सात जिल्लाको जिल्ला सभापतिको आकांक्षी हेर्दा संस्थापन ईतर भन्दा तुलनात्मक रुपमा संस्थापन पक्ष बलियो देखिएको छ ।

जसमा संस्थापन पक्षबाटै सभापतिमा विमलेन्द्र निधि प्रत्यासी हुनाले उक्त समूहमा लागेका नेताहरु पनि विभाजित हुने सम्भावना बढेको छ ।

प्रदेश २ निधिको पकड बलियो रहेको प्रदेश समेत मानिन्छ । तर गत भदौं ११ गते निधिले सम्पर्क कार्यालय सञ्चालन गर्दा थोरै जिल्ला सभापति मात्रै देखिए । जसले गर्दा खासै प्रभाव नपर्ने देउवा समुहकै नेताहरु बताउँछन् ।

यता, संस्थानपइतरले निधि समुहसँग जिल्ला नेतृत्वमा मिलेर जाने तयारी गरेको देखिन्छ । जिल्ला नेतृत्व तय गर्दा संस्थानपइतरले निधि पक्षसँग समीकरण बनाउने सक्ने समेत देखिन्छ ।

कांग्रेसले गाउँ नगरपालिका अधिवेशन कात्तिक ३० गते सम्पन्न गर्नुपर्ने, प्रदेशसभा क्षेत्रीय अधिवेशन मङ्सिर ३ गते, प्रतिनिधिसभा क्षेत्रीय अधिवेशन मङ्सिर ६ गते, एकभन्दा बढी प्रतिनिधिसभा निर्वाचन भएको जिल्लाको अधिवेशन मङ्सिर १० गतेसम्म, प्रदेश अधिवेशन भने मङ्सिर १६ र १७ सम्म र केन्द्रिय महाधिवेशन मङ्सिर २४ देखि २६ गतेसम्म हुने कांग्रेस निवार्चन समितिले जनाएको छ ।

को- को छन् जिल्ला सभापतिका आकांक्षीहरू ?

सप्तरी

सप्तरीमा संस्थापन पक्षबाट शत्रुघन यादव, नारायण चौधरी शेखर, रामदेव साह, बद्री महात्मन् र रामु यादव सभापतिका आकांक्षी हुन् ।

यादव हालका जिल्ला सचिव हुन् । भने शेखर क्षेत्रीय सभापति, शाह महासमिति सदस्य हुन् । यी पाँच जनामध्ये एक जना सभापतिमा प्रत्यासीमा देखिने चर्चा छ ।

यता, हालका केन्द्रिय सदस्य तेजुलाल चौधरीलाई वरिष्ठ नेता रामचन्द्र पौडेलले जिल्ला सभापति बनाउन रुचि देखाएका छन् । सोही समुहका अन्य तीन नेताहरु रामकुमार यादव, रामदेव साह र बद्रिनारायण यादव पनि सभापतिका आकांक्षी हुन् । रामकुमार हालका पार्टी सचिव हुन् । उनी डा.शेखर कोइराला निकट मानिन्छन् । यी चार नेतामध्ये एक जना संस्थापनइतरबाट सभापतिको प्रत्यासी बन्ने भएका छन्।

हालका जिल्ला सभापति दिनेश यादव कुनै समुहमा देखिएका छैन् । उनी जुन समुहमा देखिनछन् सोही समु्हले जिल्ला सभापति जित्न सक्ने बताईन्छ ।

सिराहा

सिराहामा संस्थापन समुहबाट रामचन्द्र यादव र उपेन्द्र यादव सभापतिको दौडमा देखिएका छन् । केन्द्रीय नेता चित्रलेखा यादव हालका सभापति रामचन्द्र यादवलाई दोहो¥याउने पक्षमा देखिएकी छिन् ।

यता, संस्थापन ईतर समुहबाट सुभासचन्द्र यादव आकांक्षी छन्। उनी पार्टीको केन्द्रीय कोषाध्यक्ष सीतादेवी यादवका छोरा हुन् ।

अर्का अहिलेका सांसद नरेशकुमार यादवको पनि जिल्ला सभापतिमा चर्चा छ । चौधरी समुदायको मत ल्याउनका लागि बलियो उम्मेद्वारको नाममा रामसुन्दर चौधरीको नाम पनि चर्चामा छ । जिल्ला कार्यसमिति सदस्य रामकिशोर यादव पनि सभापतिको आकांक्षीको दौडमा देखिएका छन् ।

धनुषा

धन्षा सभापतिका आकांक्षी बिमलेन्द्र निधिको गृह जिल्ला हो । धनु्षामा जिल्ला सभापतिमा निधि हाबी देखिन्छ । संस्थापन समुहबाट महेश शंकर गिरी, सन्तोष यादव, विश्वेश्वर यादव, योगी पञ्जियार सभापतिको आकांक्षी देखिएका छन् ।

संस्थापन समुहले गिरीलाई दोहो¥याउने पक्षमा छ । देउवा निकट गिरी हाल निधितिर ढल्किएका छन् । सन्तोष पनि सभापतिका आकाक्षी हुन् । उनी यसअघि संस्थापन ईतर समुहमा थिए ।

अर्का विश्वेश्वर पार्टीका हालका जिल्ला सचिब हुन् । पञ्जियार क्षिरेश्वरनाथ नगरपालिकाका प्रमुख हुन् । पञ्जियार र विश्वेश्वर दुबै निधि निकट हुन्।

संस्थापनइतरका लागि उम्मेद्वारका आकांक्षी कम छन्। जसमा अहिलेसम्म पनि को बन्नेमा टुङगो लागेको छैन् ।

महोत्तरी

महोत्तरीमा संस्थापन ईतर समुहमा तीन जना आंकाक्षी देखिएका छन् । जसमा नागेश्वर यादव, चिरञ्जीवी हमाल र बजरंग नेपाली रहेका छन् । यी तीन मध्ये एक जना सभापतिको प्रत्यासी बन्ने बताईएको छ । यादव अघिल्लो अधिवेशनमा पराजित भएका थिए । हमाल विगतमा खुमबहादुर खड्काको पक्षमा रहेका थिए । उनी हाल शेखर कोइराला निकट मानिन्छन् ।

संस्थापन समुहमा शुशील यादव सभापतिको प्रत्याशी देखिएका छन् । हालका सभापति महेन्द्रकुमार रायको झुकाव जुन समूहमा देखिन्छ, त्यही पक्षले सभापति जित्ने आकलन गरिएको देउवा निकट समुहका नेताहरु बताउँछन् ।

सर्लाही

सर्लाहीमा संस्थापन ईतर समुहबाट लक्ष्मण राय सभापतिमा भिड्ने देखिएका छन् । उनी अहिलेका महामन्त्री शंशाक कोईराला निकट हुन् । राय १३ औं महाधिवेशनमा पराजित भए । संस्थापन पक्षले हालका सभापति नागेन्द्र रायलाई दोहो¥याउन चाहेको छ ।

यसैगरी, अहिलेको पार्टी उपसभापति सुरेन्द्र सिंह पनि सभापतिको आकांक्षीमा देखिएका छन् । उनी अहिले कुनै समुहमा नदेखिए पनि गंगन थापा निकट मानिन्छन् ।

बारा

बारामा राम अयोध्या यादव संस्थापनइतरबाट सभापतिका प्रमुख दाबेदार हुन् । उनी शेखर कोईराला निकट मानिन्छन् । उनी पूर्व सांसदसमेत हुन् । अर्को संस्थापनईतरबाट नै राजेन्द्र यादव पनि सभापतिको आकांक्षीको दौडमा देखिएका छन् । उनी वरिष्ठ नेता पौडेल निकट हुन् ।

त्यसैगरी, संस्थापन देउवा समुहबाट अहिलेका जिल्ला सभापति जयचन्द्र चौरसिया फेरि दोहो¥याउन खोजेका छन् ।

सिटौला समुहका उमाकान्त चौधरीले रामानन्दन यादवलाई अगाडी सारेका छन् । अहिलेका पार्टी सचिव मनोज भट्ट सभापतिको आकांक्षी देखिएका छन् । बारा जिल्लामा बढी क्रियाशील बिबाद रहेको जिल्ला पनि मानिन्छ । यस जिल्लामा निर्वाचन अधिकृत जान नमान्दा निर्वाचन समितिलाइ निकै गाह्रो समेत परेको थियो ।

बारामा चार वटा निर्वाचन क्षेत्रमा १३ औं महाधिवेशनमा ८ हजार क्रियाशील सदस्य रहेकोमा अहिले एक हजार थप भएर करिब ९ हजारको हाराहारीमा सदस्यहरुको रहेका छन् ।

पर्सा

पर्सामा संस्थापन पक्षबाट जनार्दनसिंह क्षेत्री, रामनारायण कुर्मी र राजेन्द्रबहादुर अमात्य पनि सभापतिका आकांक्षी हुन् । कुर्मी र क्षेत्री समूहतर्फ देउवा खेमाका पर्साका नेताहरुमा रमेश रिजाल, सुरेन्द्रप्रसाद चौधरी, अजयकुमार चौरसियालगायत नेताहरुको साथ र समर्थन रहेको देखिएको छ ।

यता,संस्थापन पक्ष निधि समुहका अजय द्विवेदी मैदानमा देखिएका छन् । करिब १२ हजार क्रियाशिल सदस्य रहेका छन् । पर्सामा नै विरगंञ्ज महानगरपालिका भएकाले अन्य जिल्लाको भन्दा बढी प्रतिष्प्रर्धा हुने देखिन्छ ।

रौतहट

रौतहटमा संस्थापनइतरका मोहम्मद अफताब आलम जेलमा नपरेको भए सभापतिका बलियो उम्मेद्वार उनै हुने थिए । तर अहिले संस्थापनइतरबाट तीन जना रामस्नेही यादव, शेख ओकिल र देवराज तिमल्सिना सभापतिको आकांक्षी देखिएका छन् ।

रौतहटमा बिमलेन्द्र निधिको हाबी हुने सम्भावना देखिन्छ । संस्थापन समुहबाट सुनिल यादव मैदानमा उत्रने देखिएका छन् । उनी बलिया उम्मेदवार पनि हुन् । उनले अझ सजिलोसँग जित निकाल्न निधितिर झुकाव राखेको देखिन्छ ।

यता सोही समुहबाट जितेन्द्र यादब पनि मैदानमा देखिएका छन् । रौतहटमा पहाडी र मधेसी समुदायको उम्मेद्ववारले पनि फरक पर्ने देखिन्छ । चन्द्रनिगाहापुर क्षेत्रमा पहाडी समुदायहरु बाक्लो छन् ।

मुस्लिम समुदायको पनि उल्लेख्य संख्या छ । दुबै तीरको मत ल्याउँने उम्मेदवार भने अहिलेसम्म देखिएका छैनन् । रौतहट क्रियाशीलकै अल्झनमा रहेको हुदाँ १४ औं महाधिवेशनमा भाग नै लिन पाउँने नपाउँनेमा अझै अन्योल नै छ ।

कांग्रेस महाधिवेशन : प्रदेश १ मा को–को छन् जिल्ला सभापतिका आकांक्षी ?