काठमाडौं । नेपाली कांग्रेसका १४ औं महाधिवेशन अन्तर्गत सर्लाही जिल्ला अधिवेशनका लागि गएका प्रतिनिधिले राजीनामा दिएका छन् ।

कांग्रेस केन्द्रीय निर्वाचन समितिले सर्लाहीका लागि गत १७ गते नै अधिकृत तोकेका विनोद कार्कीलाई निर्वाचन अधिकृत तोकेको थियो । उनले अधिवेशन सुरु हुनुभन्दा एक दिनअघि राजीनामा दिएका हुन् ।

उनको राजीनामासँगै २७ गतेदेखि सुरु हुने मिति तय भएको सर्लाहीको वडा अधिवेशन अनिश्चित भएको छ ।

सर्लाहीमा विवाद रहेको र दुबैपक्षबीच छलफल गरी विवाद मिलाउन नसकेको भन्दै राजीनामा दिएको कार्कीले बताए ।

‘कात्तिक १७ को पत्रले मलाई नेपाली काग्रेसको आसन्न १४औं महाधिवेशन अन्तरगत सर्लाही जिल्लाको निर्वाचन सम्पन्न गर्ने जिम्मेवारीका साथ जिल्ला निर्वाचन अधिकृत नियुक्त गरिएकोमा सम्बन्धीत जिल्लामा पुगी सबै पक्षसँग छलफल गरि निर्वाचन प्रक्रिया अगाडि बढाउन खोजेकोमा दुई पक्षहरुबीच सहमति नजुटी निर्वाचन हुने वातावरण नभएकोले यसमा व्यक्तिगत जिम्मेवारी लिई जिल्ला निर्वाचन अधिकृतको पदबाट आजैको मितिबाट राजीनामा दिएको व्यहोरा अनुरोध गर्दछु ।’ उनको राजीनामा पत्रमा भनिएको छ ।