काठमाडौं । नेकपा (एकीकृत समाजवादी)ले पार्टी एकताका लागि सबैसँग वार्ता गर्ने निर्णय गरेको छ ।

पार्टी स्थायी समितिको शुक्रबार बसेको बैठकले कुनै पनि पार्टीको शक्ति, क्षमता र जनाधार, राजनीतिक दृष्टिकोण र महत्वका आधारमा सबैसँग वार्ता गर्ने निर्णय गरेको पार्टी उपमहासचिव तथा प्रचार विभाग प्रमुख जगन्नाथ खतिवडाले जानकारी दिए ।

बैठकमा महासचिव डा. बेदुराम भुसालले विभिन्न दलसँग भएको वार्ताकाबारेमा रिपोर्ट पेश गरेका थिए । भुसालले पेश गरेको रिपोर्ट बारेको प्रस्ताव केन्द्रीय कमिटि बैठकमा लैजाने स्थायी कमिटिले निर्णय गरेको पनि खतिवडाले जारी गरेको प्रेस विज्ञप्तिमा उल्लेख छ ।

शुक्रबार बसेको स्थायी समितिको बैठकमा बोल्दै पार्टी अध्यक्ष माधवकुमार नेपालले नेपाली राजनीतिमा आफ्नो पार्टीको महत्व दिनानुदिन बढीरहेको, पार्टी प्रवेशको लागि आकर्षण बढिरहेको बताएका थिए ।

नेकपा एमालेले आफूहरु विरुद्धमा षडयन्त्रमूलक तरिकाले झुट र भ्रम फैलाइरहेको भन्दै नेपालले त्यसकाविरुद्ध अझ सशक्त भएर लाग्न आह्वान गरे ।

पाँच दलीय गठबन्धनले केन्द्रीय समन्वय समिति गठन गरी गठबन्धनलाई स्थायी स्वरुप दिन मद्दत पुगेको भन्दै उनले समन्वय समितिले आगामी सबै निर्वाचनका विषयमा पनि एकताबद्ध भएर जाने दिशा तय गरेको बताए ।

साथै नीतिगत विषयहरुमा, सार्वजनिक महत्वका विषयमा र विकासका विषयमा पनि गठबन्धनले साझा धारणा बनाउनेतर्फ अग्रसर भएको नेता नेपालको भनाइ छ ।

उनले अब पार्टी सबै तहका निर्वाचनको तयारीमा जुटुनुपर्ने भएकाले देशभरका सबै पार्टी कमिटीहरुले तीब्र गतिमा आवश्यक योजना बनाइ काम गर्न पार्टी नेता कार्यकर्तालाई निर्देशन पनि दिएका छन् ।